PAGPAMAKUNA BATOK TIPDAS PALUGWAYAN SA CEBU

Wa pa katunga ang Cebu Provincial Health Office (PHO) sa ilang target sa pagpamakuna batok tipdas sa lalawigan sa Sugbo.

Ug tungod niini, ilang lugwayan ang ilang Supplemental Immunization Program.

Niabot pa lang sa 20% ang accomplishment nila diin anaa pa sa 65,424 ka mga bata ang ilahang nabakunahan.

Matod ni Maria Lorraine Gimperoso, Child Care Nurse Coordinator sa PHO nga ang ilang buhatan target nga makapabakuna sa 327,121 ka mga bata sa di pa matapos ang tuig 2018.

“Hopefully, maabot og 5060 percent nga accomplishment sa target,” matod ni Gimperoso.

Dugang niini nga nagpahigayon na lamang sila karon og map-up aron masuta og asa pa ang lugar og si kinsa pa ang mga bata nga wala pa mahatagi og bakuna batok sa tipdas.

Sa datus sa Department of Health (DOH) 7 gikan sa Enero hangtod sa Disyembre 1 ning tuiga, anaa sa ikatulo ang dakbayan sa Sugbo sa gidaghanon sa kaso sa tipdas nga anaay 28 nga natala nga mga kaso.

Nag-una ang dakbayan sa Dumaguete nga 48 ka mga kaso ug gisundan sa lungsod sa Consolacion nga 28 ka kaso.

Way natala nga namatay sa tipdas sa lalawigan sa Sugbo.

Padayon nga giawhag sa PHO ang mga ginikanan nga dili magdumili sa paghatag sa bakuna sa ilang mga anak batok sa tipdas sanglit ang bakuna niini dugay nang gipanaghatag og segurado ang kalidad niini.