P3K nga multa anti-poor: Labella
Gihulagway ni Bise Mayor Edgardo Labella nga anti-poor ang gitinguha sa dakbayan sa Sugbo nga himuong P3,000 gikan sa kasamtangan P1,000 ang mga administrative penalty sa matag traffic violation nga malapas sa mga motorista.
Ang standard bearer sa Barugg PDP-Laban sa pagka-mayor sunod tuig niingon nga maluoy siya sa mga kabos nga mga drayber kinsa namasada aron makabuhi sa ilang pamilya apan ang ilang kita sa higayong adunay traffic violation, maadto ra sa multa.
“If he makes it across the board that is anti-poor. If it is only a very simple traffic violation, I think P3,000 is too much. Considering that there are a lot of poor drivers specially those driving public utility vehicles,” matod ni Labella.
Iyang gitugtan nga adunay lainlaing klase sa salaod kini sama sa serious, less serious ug light offenses nga unta maoy basehan sa pagpahamtang og silot.
Iyang gipadayag nga dili ang pagpabug-at sa bayranan maoy hingpit nga solusyon sa maayong pagdumala sa trapiko inay ang mga traffic enforcer kinahanglan nga anaa kanunay sa karsada ug dili lang magpalandong sa daplin aron moasikaso sa dagan sa mga sakyanan.
Iyang gipahibawo nga kon adunay makita nga traffic enforcer ang mga driver, magdugaduha kini paglapas sa lagda sa trapiko.
Si Konsehal Joel Garganera ni-segunda kang Labella diin iyang gibasol si Mayor Tomas Osmeña.
“Ang kapalpak sa atong traffic diin siya 30 na ka tuig nga mayor ang mga pobre nga driver maoy iyang pahimungtan.” Padayag ni Garganera.
Iyang giasoy nga gi-veto ni Osmeña ang iyang Consolidated Traffic Ordinance nga naghiusa sa tanang amendment gikan niadtong 1970’s diin nakahan-ay na ang tanan lakip ang 61 ka amendment gikan sa orihinal nga traffic ordinance.
Si Konsehal Raymond Garcia niingon nga angayan paminawo ang mga driver nga apektado.
“That has to pass through the process. Kinahanglan ipaagi una na sa ordinansa so that adunay public hearing and we could hear the sides of the affected motorists,” matod ni Garcia.
“Para kanako dako ra ang amount nga P3,000. Maayo nga ato sa ning obserbahan ang P1,000 and we will work from there kon naa bay effect per kon dili that’s the only time we will consider raising it again maybe P2,000 or P3,000,” dugang niya.
Una niini, si Francisco “Isko” Ouano, operation head sa Cebu City Transportation Office (CCTO ) niingon nga buot ipatuman ni Osmeña ang maong silot aron madisiplina ang mga drayber.
Walay pagsupak sa tinguha nga pag-usbaw sa traffic fines ang mga konsehal sa Bando Osmeña Pundok Kauswagan (BOPK).
Si Konsehal Dave Tumulak niingon nga andam siyang mopalabang og amendment sa iyang ordinansa nga naghimo sa P1,000 nga multa gikan sa kanhi P500 sa mga traffic violation sa siyudad.
Si Konsehal Joy Young, Jerry Guardo niingon nga nga dili kwarta ang giapas sa maong tinguha inay ang pagdisiplina sanglit ilang gihulgway nga way mo-respeto sa balaod kon gaan ang silot.
Ang mga konsehal sa BOPK maoy mayoriya sa City Council busa daling matuman ang gusto sa mayor.