3 ka E-gates sa MCIA Terminal 2
Napahimuslan na sa mga pasahero sa Terminal 2 sa Mactan-Cebu International Airport (MCIA) ang tulo ka mga electronic gate nga gimontar sa Bureau of Immigration (BI).
Mao kini ang gipahibawo sa kadagkuan sa tugpahan ug BI sa mga sakop sa mga tigbalita kagahapon, Disyembre 5.
Matod ni Nelson Gallentes, Senior Immigration Officer sa Port Operation Division sa BI, nga niadtong Oktubre 25 pa lang pormal na nga online ang naasoyng mga makina.
Ang maong mga makina napanglantawan nga mao unyay mopadali sa pagproseso sa pag-abot sa mga pasahero diha sa Terminal 2 gikan sa nagkadaiyang destinasyon gawas sa nasod.
Nasayran nga ang usa ka pasahero makagahin gayud ug dili mominos 40 segundos sa ilang pag-abot sa tugpahanan gikan sa ilang biyahe aron lang molinya sa mga arrival counter sa tugpahanan.
Apan nunot niining pagmontar na sa mga electronic gate sa tugpahanan gikatakdang makagahin lang ang matag pasahero ug 10 ngadto sa 15 segundos sa ilang panahon gumikan kay igo na man lang nila nga e-scan ang ilang mga passport sa naasoyng mga makina.
Kompleto ang naasoyng mga makina sa mga modernong security features sama sa facial recognition ug biometric scanning bar code reading ug smart card recognition.
Niining paagiha dali na usab unya ang pag-ila sa mga pasahero nga posibleng adunay mga record o pinangita sa balaod ug nalakip sa watchlist ug hold departure order sa BI.
Apan dili mahimo makapahimus sa electronic gate mao ang mga langyawng pasahero sanglit dili mabasa ang ilang passport ug uban pang ginagmay nga dili mahimo sa makina.