Taxi driver nanghinol?

Usa ka taxi driver ang gireklamo sa pagpanghikap sa mga pribadong bahin sa iyang pasahero sulod sa gimaneho nga taxi sa Barangay Langtad siyudad sa Naga, kagahapon, Disyembre 5, alas 12:30 sa kaadlawon.

Gikasuhan og acts of lasciviousness si Jony Canete Tura, 50, minyo ug molupyo sa Luray 2, dakbayan sa Toledo.

Ang biktima niini usa ka cashier sa dakong mall nga si Baby (dili tinuod nga pangalan), 23, residente sa Barangay Tipolo, dakbayan sa Mandaue.

Matod sa kapulisan sa Naga, gikan pa sa Badian, Cebu si Baby atong higayona.

Base sa spot report, si Baby misubay nga nisakay siya sa usa ka motorsiklo paingon sa Moalboal tungod kay wala nay bus nga masakayan pabalik sa siyudad sa Sugbo.

Sa dihang naabot na siya sa Moalboal, nakakita siya og taxi nga naghuwat og pasahero ug iya kining gisabot nga moplete siya P500 paingon sa siyudad nga giuyonan sab sa drayber nga si Tura.

Pag-abot na nila sa Langtad, Naga, gisugdan og hikap ni Tura ang mga pribadong bahin sa iyang lawas.

Si Baby nahadlok ug gihangyo ni Tura nga hunongon na ang iyang law-ay nga gibuhat apan wala siya panumbalinga ug padayon lang kini sa paghikap.

Pag-abot na nila sa usa ka mall sa dakbayan sa Sugbo, nakahunahuna og rason si Baby nga mangihi ug gitugutan siya ni Tura, ug didto kini siya nakakita og higayon nga makakontak sa iyang pamilya.

Si Tura nagdali sa pagpadagan sa taxi para makaikyas, apan nakuha ni Baby ang plate number sa taxi ug dayon kining ni-report sa police Station 2 sa Mandaue.

Human nadawat ang maong report, giaresto sa kapulisan ang suspek nga si Jony Canete Tura.