AWAY SA BUWANGAN MOTIBO SA PAGPATAY?
Gisusi karon sa kapulisan kon aduna bay grabeng panagbangi nga nahitabo sa nga sugarol sa buwangan sa dakbayan sa Mandaue.
Kini human nga laing masiador ang gipusil-patay Martes alas 9:30 sa gabii, samtang nagdrive sa iyang motorsiklo sa may eskina sa dan P. Burgos ug dan A.C Cortes, Barangay AlangAlang, siyudad sa Mandaue.
Ang biktima giila nga si Eleazar Garciano, 54, taga San Jose Dela Montaña, Barangay Mabolo, sa dakbayan sa Sugbo.
Matod ni SPO1 Marino Lofranco, imbestigador sa Centro Police Station nga sa ilang imbestigasyon gikan namuwang si Garciano sa D and C Coliseum sa Barangay Ibabao-Estancia, ug samtang padung na pauli, gisundan kini sa duha ka lalaki nga naka-motorsiklo.
Pag-abot sa Alang-alang, gipusil sa back-rider sa makadaghan si Garciano. Patay diha-diha si Garciano.
Usa sa nasuta nga suod kini nga higala niadtong masiador usab nga gipusil patay sud sa buwangan sa niadtong Nobiyembre 27 nga si Carlos “Bading” Reyes.
Matod ni Lofranco nga base sa pamahayag sa mga saksi nga planado ang pagpatay ni Garciano.
Giingon nga kusog usab motago si Garciano kon di mobayad sa pustaanay kon mapildi.
Personal grudge ang gitan-aw sa kapulisan nga motibo sa krimen, apan wa usab nila gipadaplin ang uban pa nga anggulo.
“Amo na gi-verify ang report nga daghan sad ang nasuko kay motalo daw ni sya. We are
coordinating with the Cebu City Police sa background pa aning biktima sa ilaha,” matod ni Lofranco sa mga tigbalita.
EX-CON PATAY
Samtang, patay na nga nadangat sa ospital ang usa ka 32-anyos nga lalaki, samtang nagmaneho sa iyang motorsiklo padung pauli, alas 3 sa hapon sa Disyembre 5.
Si Romeo Mejias, taga sitio Sto. Rosario, Barangay Jagobiao, syudad sa Mandaue, gipusil sa duha ka lalaki nga naka motorsiklo usab sa may Jagobiao Highway corner Eversley Road.
Matod sa mga nakasaksi nga sa dihang natumba si Mejias, giduol kini ug gitiwasan sa pagpusil.
Daling nisibat ang killers. Gidali pa unta si Mejias pagdala sa mga tawo nga duol sa
crime scene sa pinakaduol nga hospital, apan patay na kini pag-abot.
Matod ni PO1 Glenn Bordalba, ang inbestigador sa Basak Police Station, gikan nagpatupi sa lungsod sa Consolacion si Mejias.
Si Mejias ang giingon nga bag-o lang nakagawas sa Mandaue City Jail niadtong Septiyembre 2018, tungod sa kaso may labot sa ilegal nga drugas.
Hinungdan nga usa sa motibo nga gisunod sa kapulisan nga may kalambigitan sa ilegal nga drugas ang kamatayon sa biktima.
Nakuha sa crime scene ang tulo ka kabhang sa bala nga gituohan nga iya sa 45 kalibre nga armas.