Talisay malinawon: Gullas; PRO 7 nangita sa tag-iya sa mga armas

“The peace and order in the city is fine.”

Mao kini ang reaksiyon ni Mayor Eduardo Gullas bahin sa naugkat nga lima ka sakong nga 80 ka mga pistola sa Barangay Campo 4, dakbayan sa Talisay niadtong Martes, Disyembre 4, nga giingong gipanag-iya sa grupo ug mga dautang elemento sa dakbayan.

Si Gullas ningon nga dugang kapulisan ang gidestino sa Barangay Tangke nga nabaniog nga daghan tigpayuhot sa gidiling drugas aron pagmintinar sa kahusay ug kalinaw sa dapit.

Sa naugkat sa mga pistola, ang Talisay Police nabalaka nga dunay grupo nga nanag-iya niini nga posibling gamiton sa umaabot nga eleksion, sindikato, kriminal sa dapit o rebeldeng komunista.

Ang mga armas naglakip sa 40 ka mga .38 caliber pistols ug laing 40 ka mga pistola ang naugkat sa nahisgtang dapit.

Samtang, gipapangita na sa Police Regional Office (PRO) 7 ang tag-iya sa mga armas.

Gimandoan karon ni Chief Supt. Debold Sinas, direktor sa PRO 7, ang Talisay City police station ug ang Provincial Intelligence Branch nga mobalik sa Campo 4 diin nakit-an kadtong upat ka sakong mga armas.

Nagduda ang PRO 7 Director nga aduna pay gipanglubong sa maong dapit nga maoy hinungdan nga subayon kini pinaagi sa paggamit sa mga metal detector.

Gitumbok sa PRO 7 nga usa ka Gerome Labitad maoy nanagiya sa mga armas nga gilambigit sa mga krimen sa Talisay ug mga silingang lungsod sa probinsya sa Sugbo.

Nalakip sa most wanted person sa kapulisan sa Talisay si Labitad sanglit giingong mao kini ang lider sa mga gun for hire, gun runner ug nalambigit usab sa illegal nga drugas.

“We suspected na this one came from the group of Labitad mao ni siya didto number 1 most wanted didto involved ilang grupo sa shabu, gun running and sometimes gun for hire,” matod ni Sinas.

Ang balay ni Labitad mga 30 metros lang ang gilay-on gikan sa mga armas nga gilubong sa kasagbutan.

Sa gihimong back tracking sa mga kaso ni Labitad nasuta nga gawas sa iyang mga armas nga kalibre .38 aduna matod pa kini tag-as nga kalibre sa armas.

Target na usab sa one time big time operation si Labitad sa PRO-7 sa miaging mga bulan apan sa pag-abot sa balay niini wala kini nila maabti.

Nagduda si Sinas nga adunay nakapahibalo sa suspek hinungdan nga wala na kini sa iyang balay.

Nabantayan sa heneral nga kasagaran sa mga patay sa Talisay ang gipang- gamit ang kalibre .38 nga armas nga mao usab ang nakuha sa mga police sa sulod sa upat ka sako.

Ipaubos sa ballistic exam ang mga nakuhang armas sa PNP Crime laboratory 7 kung kini didto ba gihimo sa syudad sa Danao ug mahimong mahibaw-an kinsa ang nag himo niini.