Sobrang multa sa traffic violations anti-poor

Dunay laraw ang Cebu City Government nga pausbawan ang multa sa mga traffic violations gikan sa P1,000 ngadto sa P3,000. Tumong niini mao ang hugot nga pagdisiplina sa mga abusadong drivers kinsa giingon nga maoy usa sa mga nakatampo sa kabug-at sa dagan sa trapiko sa dakbayan.

Si Francisco Ouano, pangulo sa Cebu City Traffic Office (CCTO), mipasabot nga ang mga violations nga maapektohan niini mao kadtong sa kasamtangan adunay minimun penalty nga P1,000.

Lakip niini mao ang no entry ug no U-turn, pagbaliwala sa go ug stop signals, no left turn ug no right turn, no parking anytime; no stopping, right and left turn only ug daghan pa.

Sa laktod nga pagkasulti, halos tanan nga mga violations, ang maingon nato, nga isaka ngadto sa P3,000 ang multa.

Daghang kaspa ang miulbo ning maong plano tungod kay alang kanila, sobra ra ka dako ang maong multa.

Sa mga yanong drivers ang P1,000 nga penalty sakit na kaayo alang kanila, ug unsa pa kaha kon moabot kini og P3,000.

Mora og giduot na hinuon og samot ang kabos natong mga public utility drivers ning balaora kay sa pagkatinuod lang bisan unsa pa nila ka matinumanon duna gyuy panahon nga sa tanto intawon nilang paningkamot, di kalikayan nga makahimo sila og kalapasan.

Dili kaha matawag nga anti-poor kining balaora kon kini ipatuman na?

Angay siguro nga hatagan og prayoridad sa siyudad ang hugot nga pagpasunod sa mga traffic rules kay hangtod karon daghan gihapong mga violators ang naobserbahan nga wa mabadlong, ilabi na og impluwensiyadong tawo ang makahimo.

Kini sama niining pribado nga mga sakyanan nga padayon nga nagparkingan daplin sa mga kadalanan.