Without you, life is nothing
Nagdali kong miagpas kanila ni Yenyen ug Rowena. Naabtan ko sila sa among gate. “Yen, Rowena, ayaw sa mog pauli.”
Gihawiran ko ang duha. Giatubang man tuod ko nila apan way kalipay nga nakita ko sa ilang nawong. Nagkusmod sila.
“Ingon diay ka ani ngadto sa inyong mga katabang, Ruby? Sakit kaayo kang manulti nila, uy.”
Kalit nga misaka ang akong dugo sa akong ulo. Naglagot ko sa gisulti ni Yenyen.
“Gisamok ko niya. Suluguon lang namo siya. Wa siyay katungod nga modisturbo nako!” Nataas ang akong tingog.
“Suluguon lang bitaw sila, Ruby. Pero tawo sab sila nga dunay kasingkasing nga masakitan. Mata-pobre ka man diay.”
Wa na ko makapugong sa akong kalagot labi na sa pag-ingon ni Rowena nga mata-pobre ko.
“Kon miari mo aron lang nga inyo kong awayon, mas maayo pa nga manglayas na mo!”
Gisingkahan ko ang duha. Wa na ko maghuwat sa ilang isulti nako. Nagdali kong misulod sa among sala. Milargo ko sa among terrace. Duha ka andana ang among balay. Dako ug nindot kini. Pulos gud dagkog posisyon ug suweldo ang akong mga ginikanan sa gitrabahoan nilang opisina?
Nalantawan ko sila si Yenyen ug Rowena nga naglakaw pahilayo sa among balay. Nanakay silag dyip depasaheroan. Di layo sa kasada ang among balay. Kon di na mo nako, aw, labaw na nga di na ko ninyo. Mga mahilabtanon mo sa akong kinaiya! Hilom kong nagyawyaw.
Wa na ko mobalik og tugtog sa piyano. Para nako, gibwisit sa duha ko ka amiga ug sa among suluguon ang akong adlaw niadtong tungora. Aw, di na diay nako amiga sila si Yenyen ug Rowena sukad karong adlawa. Ngano ba sab kon masuko sila nako? Unsay ilang labot sa akong kinabuhi nga mag-apil-apil man sila kon unsay akong buhaton sa among katabang?
Pagka ugma nagkita mi si Yenyen sa eskuwelahan. Nagkasugat mi. Wa mi magtingganay. Nagkusmoray ming duha. Gisulingahan ko siya. Giyam-iran sab ko niya.
“Tse!” Gikusog ko kini aron makadungog gyud si Yenyen. “Tse ka sab!” Mibawos sab si Yenyen. Mipaturatoy kog lakaw. Gikasugat ko sab si Rowena sa school campus. Wa sab mi magtingganay ug nagkusmoray sab mi.