BLATCHE ANDAM MOBALIK SA RP 5
Pinaagi sa social media, gipadayag ni naturalized player Andray Blatche nga andam gihapon siyang morepresentar sa Pilipinas sa international competitions sa umaabot.
Ang 32 anyos nga kanhi magduduwa sa National Basketball Association (NBA) nag-post og hulagway sa Instagram diin kauban niya sila si Jayson Castro, Terrence Romeo, ug Calvin Abueva nga nagsul-ob og national team gears on.
Adunay nakasuwat niini nga, “3 of us are missing I’m sure they ready as well let’s do wats need to be done ‘the bad boyz.’”
Sa upat, bugtong si Castro lang gilakip ni national coach Yeng Guiao sa 20-man national training pool alang sa fifth window sa 2019 Fiba World Cup Asian qualifiers diin masakit nga sunodsunod nga kapildihan ang naangkon sa host Team Pilipinas batok sa Kazahkstan, 92-88, ug Iran, 78-70.
Gumikan niini, adunay panawagan nga kuhaon og balik sa Team Pilipinas si Blatche alang sa 6th window sa Fiba World Cup Asian qualifiers diin moasdang ang mga Pinoy sa Kazahkstan ug Qatar karong Pebrero sa sunod tuig.
Ang Team Pilipinas nahagsa sa ikaupat nga luna sa Group F dala ang 5-5 nga rekord diin nagsunod sila sa Australia (91), Iran (7-3), ug Japan (6-4).
Ikalima ang Kazahkstan (46) ug ikaunom ang Qatar (2-8).
Ang mopatigbabaw nga tulo sa Group F ug Group E lakip na ang 4th placer overall nga adunay mas maayong rekord ang maka-qualify sa 2019 World Cup nga ipahigayon sa China.
Sa kasamtangang sitwasyon sa Group F, kinahanglang modaog ang Team Pilipinas sa katapusan niining duha ka mga tahas.
Sila si Blatche, Romeo ug Castro nakahuman na sa ilang tulo ka mga duwa nga suspensyon gikan sa FIBA tungod sa ilang pagkahilambigit sa karambola sa grabeng karambola tali sa Team Pilipinas ug Australia kaniadto.
Sa iyang bahin, si Abueva wala na’y poruhan nga makaduwa sa Asian qualifiers gumikan kay unom man ka mga duwa ang suspensyon niini sa FIBA.
Gipasabot nang daan ni Guiao nga wala niya hingpit gisarado ang pultahan alang kang Blatche ug iyang gipasabot nga apil lang gihapon kini sa programa sa national team.