LA Lakers mokampiyon pagbalik: Bryant

Masaligon si basketball legend Kobe Bryant nga nagsubay sa sakto nga dalan ang Los Angeles Lakers alang sa tinguha niining mahibalik ang malampuson niining kampanya sa National Basketball Association (NBA).

Si Bryant, kinsa nagduwa sa Lakers sa tanan niyang 20 ka mga tuig sa NBA, nagtuo nga manug-abot na ang adlaw nga mapusgay sa Lakers ang kanunay’ng paghari sa Golden State Warriors sa Western Conference, nga maoy labing lig-ong babag paingon sa national finals.

Ang multi-titled Lakers wala nakasulod sa playoffs sa miaging lima ka mga tuig ug sa panahom ni Bryant, mahuman na ang pag-antos sa team ning maong season.

Sa kasamtangan, ang Lakers naa sa ikalimang dapit sa Western Conference dala ang 14-9 nga rekord, usa ka maayong senyales sa ilang kampanya ning maong season.

Gisugdan sa Lakers ang pagpalig-on og balik sa ilang puwersa pinaagi sa paghaylo kang four-time MVP LeBron James gikan sa Cleveland Cavaliers.

Sa pangutana kon sa iyang tan-aw aduna ba’y kapabilidad ang grupo ni James nga magtunol og laing titulo alang sa Lakers, si Bryant positibo og tubag.

“Of course they will. Of course they will,” batbat ni Bryant, kinsa nakahatag og lima ka mga titulo sa Lakers.

“They have determination to figure it out. They will figure it out. They have talented players. So enjoy the journey because we’ll be champions before you know it. Then we’ll just be laughing at all the Warrior fans.”

Gitataw hinuon ni Bryant nga dili kini mahitabong mokampiyon og balik ang Lakers kon magsalig lang kini’g maayo kang James.

Kinahanglang molihok ang tanang sakop sa Lakers aron suportahan ang ilang bag-ong lider.