SPURS LUBONG OG TAGA LIOG
Daw natakdan sa pamulso ni 3-point artist Kyle Korver ang tibuok puwersa sa host Utah Jazz ug nangigo kini sa gawas aron ipanglubong og taga liog ang San Antonio Spurs, 139-105, kagahapon sa National Basketball Association (NBA).
Ang Jazz usa sa teams sa liga nga dili mamuntos sa threepoint land apan sa paghiabot ni Korver, kanunay na sila mangigo ning maong departamento ug ning sangkaa, mikulit sila og kaugalingong rekord nga 20 ka three-point shots.
Si Korver, kinsa miduwa sa labing una niyang home game sukad siya mitapon sa Jazz gikan sa Cleveland Cavaliers, niamot og 15 puntos alang sa kadaugan. “His confidence is contagious,” matod sa batan-ong pambato sa Jazz nga si Donovan Mitchell.
“His presence just gives us spacing and helps everybody.”
Gipangulohan ni Mitchell ang Jazz pinaagi sa iyang 20 puntos, nidugang og 18 puntos si Rudy Gobert, samtang nitampo og 14 puntos si Derrick Favors.
Ang Jazz, nga mingsaka sa 12-13 nga rekord, mingrehistro sa labing una nilang kadaugan sulod sa ilang balwarte sa milabayng hapit usa ka buwan. “He gets his shot off in a half
a second. It helps us to have another guy who can really space the floor and knock them
down,” matod sa laing sinaligan sa Jazz nga si Joe Ingles kabahin kang Korver.
Si Ingles mitunol og 13 puntos alang sa Jazz.
Ang Spurs, nga nahagbong sa 11-13 nga rekord ning talagsaon nilang pagkalubong, gipangulohan ni Jakob Poeltl pinaagi sa iyang career-high
20 puntos samtang ninghatag og 16 puntos matag usa sila si DeMar DeRozan ug LaMarcus Aldridge.
Kini maoy ikalima pa lang nga higayon nga nalubong ang Spurs og 30 puntos o pataas sulod sa 1,758 ka regular season games nga gigiyahan ang team ni coach Gregg Popovich. “We’re very challenged defensively,” matod ni Popovich. Nakaduolduol na unta ang Spurs, 53-67, sa sayong bahin sa 3rd quarter.
Apan paglabay sa pipila ka mga minutos gikan niini, nagpabuto sila si Mitchell ug Ingles og duha ka sunodsunod nga three-point bombs aron inaton ang ilang labaw ngadto sa 84-59.
Si Korver, kinsa nakadawa sa Jazz niadtong 2017 hangtod 2010, nakadayeg sa ilang duwa. “It was a great first night
back. I have a lot of good memories of this place,” matod ni Korver.
“We played really good basketball. The ball was moving. We were playing for each other.”
Ang Jazz mirehistro og 60.7 percent shooting sa ilawom nga bahin ug 60.6 percent sa three-point area nga pulos labing taas nilang nahimo karon nga season.