4 KA MGA TAWO SA CARCAR GIPATAY

SuperBalita Cebu - - FRONT PAGE - / AYB , GPL

Upat ang patay samtang duha ang naangol sa mga pagpamusil sa siyudad sa Carcar sud lang sa kapin pito ka oras sa managlahing mga dapit niini.

Tulo niini namatay sa pagpangrakrak sa Barangay Ocaña samtang ang usa nga wa pa mailhi nahitabo sa Sitio Ylaya Dapdap, Barangay Poblacion 3.

Pasado ala una sa Huwebes sa kaadlawon, Disyembre 6, gipamusil sa duha ka wa mailhing mga lalake ang upat ka mga tawo sa sitio Bonbon, Barangay Ocaña, diin tulo niini namatay ug usa naangol.

Ang mga namatay giila nga silang Premitivo Gemo ug Raprap Navares, taga barangay Napo, kinsa pulos namatay diha-diha.

Dead on arrival sa tambalanan si Donde Carvajal ug ang naangol mao si Sherwin Gemo.

Matod ni Barangay Kapitan Dario Ramos nga ang mga biktima giingong gikan nga namilar.

Pag-abot sa balay ni Carvajal, nag inom pa kini sa sulod ug pipila ka minuto ang nakalabay, adunay nanuktok sa pultahan.

Sa pag-abli kalit lang sila nga gipamusil.

Sa imbestigasyon sa Carcar City police station, drugas ang ilang gitan-aw nga motibo sanglit aduna silay impormasyon nga nadawat nga ang mga biktima giingong nalambigit niini.

Matod ni Supt. Gregorio Galsim, hepe sa Carcar City police station, nga ang mga biktima naila nga mogamit sa illegal nga drugas.

“Koan man gani, Sir, these persons are known to the place nga medyo koan ba, naay involvement sa mga kabalo na ka, sa mga bisyo-bisyo,” nagkanayon si Galsim sa interbyu sa Superbalita Cebu.

Dugang ni Galsim nga ang duha sa napatay giingong drug surrenderer nga wa lang una nganli kinsa nila.

Apan sa record ni Ramos, wa malambigit sa illegal nga drugas ang mga biktima apan wa na siya masayod sa lista sa kapulisan.

Usa ka buwan na ang nakalabay, adunay mga lalake nga magsakay og motor nga nanoktok usab sa balay ni Carvajal nga Tagalog ang sinultian.

Newspapers in Tagalog

Newspapers from Philippines

© PressReader. All rights reserved.