‘NANGAWAT, NANGILAD’ SAB SA FB
SUSPEK MI-APPLY PA SA CALL CENTER
Babaye nga nangaplay pagka-call center agent nabiktima sa pagpangilad sa laing babaye nga aplikante. Lakip sa gikuha ang iyang
cell phone nga wa gi logout ang Facebook.
Mao kini ang giingong gigamit sa suspek sa pagpangilad gamit ang Facebook account sa biktima.
Nadakpan sa entrapment
operation sa National Bureau of Investigation (NBI) si Theresse Avergonzado Lopez, 29.
Nidangop si Glenda Fragio sa NBI human nangilad ug nangayo og kwarta sa iyang mga higala si Lopez gamit ang naka-log in nga Facebook account sa biktima. Nasikop si Lopez sa NBI 7 niadtong Miyerkules, Disyembre 5, 2018. Iyang nabiktima si Fragio, 39, kinsa nang-apply pagka call center agent niadtong Nobiyembre 13.
Sa iyang affidavit, niasoy si Fragio nga nagpaka-aron ingnon nga aplikante sab si Lopez ug nakadungan niya kini sa interview sa giaplayan niya nga
call center company. Nauna sa pag-interview si Lopez. Gihulaman ni Lopez ang cellphone ni Fragio ug gipabilin ang iyang bag sa wa pa mosulod sa
interview room aron matod pa di ma-distract ang biktima.
Samtang gi-interview si Fragio, nilakaw si Lopez dala ang
cellphone ug kwarta sa biktima nga kapin sa P2,000 nga gikuha niya sulod sa gibilin nga bag.
Uwahi na usab nga nahibaw-an ni Fragio nga peke ang ngalan nga gigamit ni Lopez sa iyang interview.
Di na usab ma-contact ang cellphone nga gikawat ug ang gibutang nga cellphone number sa suspek sa iyang application documents.
Wa pa nakontento, gigamit ni Lopez ang Facebook account ni Fragio nga naka-log in sa iyang gikawat nga cellphone, aron mangilad sa mga higala niini ug nangayog kwarta. Wa pa makontento, nang
chat pa kini og mga langyaw ug mga Pinoy nga lalake ug gipangayo-an sab og kwarta bugti sa pictures nga iya sa biktima, nga anaa sab naka-save sa gikawat nga cellphone.
Usa sa mga higala ni Fragio nakapadala og P1,000 ngadto kang Lopez human naluoy kay nagtuo nga ang nangayog tabang kaniya mao ang iyang amiga.
Nakabiktima og laing higala ni Fragio si Lopez apan niining higayona, wa siya mahibalo nga nakig-alayon na kini ngadto sa tinuoray niya nga higala.
Nunot niini, nagpatabang si Fragio sa NBI ug gi-entrap si Lopez nga padalhan unta og laing P1,000. Didto na sa usa ka branch sa money remittance company sa Tabunok, Talisay City nadakpan si Lopez.
Matod niya, nahimo niya ang krimen tungod sa kawad-on ug sa daghan niyang bayranan.
Nangayo og pasaylo si Lopez sa biktima, apan desidido si Fragio nga ipadayon ang kaso. Napaubos na inquest proceeding si Lopez sa Talisay City Prosecutors Office niadtong Miyerkules, Disyembre 5.
Lakip sa mga kasong gisangat batok kaniya mao ang theft, estafa ug pagamit og fictitious nga ngalan ubos sa Cybercrime Prevention Act of 2012. /