Mga paring bayot mag-madre

SuperBalita Cebu - - SUPER BIRADA - Bobby Nalzaro ([email protected] gmail.com)

Way lipodlipod nga giangkon ni Pope Francis nga dakong problema karon sa Simbahang Katoliko ang nagkadaghan nga mga paring bayot ug nag-practice og homosexuality. Matod pa sa Santo Papa, usa ka dakong sagpa sa Simbahan ang gihimo sa mga pari kay lagi ang usa sa gitamod sa simbahan mao man ang moralidad. Kon moralidad ang hisgustan, gikinahanglan nga magtamod ang taga Simbahan niini aron magpabilin nga putli. Kon si Presidente Duterte ang pa-estoryahon mga 90 per cent sa mga pari homosexual. Di sab siguro ingon ana ang gidaghanon kay duna may mga pari nga chickboy sab.

Unsaon man sa kaparian sa pagsangyaw ug pagpasunod niini sa mga misagop sa tinuhuang Katoliko kon ang kaparian mismo naghimo usab ning immoral nga kalihukan? Ang pagdili niining homosexuality nahulog lang gihapon sa pagtamod sa kaparian sa “vow of celebacy”. Buot ipasabot nga dili mo-practice og pagpakighilawas ug magpabiling putli. Mao bitaw ni ang hinungdan nga di tugutan nga magminyo ang mga pari.

Gumikan sa daghan na kaayong bayot nga mga pari, daghang mga parokya ug mga diocese sa ubang kanasuran labi pa sa Estados Unidos ang nangabangkaruta. Ngano man? Kasagaran sa gi-abusuhan sa mga bayot nga pari sa gawas sa nasud mga batan-on. Unya moreklamo sa korte ug dayon pabayron og civil damages ang mga akusadong pari. Unya wa may ibayad nga personal ang pari mao nga ang parokya o diocese ang mobayad. Aw, pordoy ang Diocese mao nang manira na lang. Ang ubang mga kapilya didto sa Amerika nanira ug gihimo nang bar.

Sus, dinhi lang sa ato, daghan kaayong mga paring bayot nga nagpabilin gihapon nga nag-alagad sa simbahan. Dili lang mga bayot kon dili apil na ang mga pari nga adunay mga kulukadidang ug mga anak. Unsa man usab ang gihimo sa kadagkuan sa simbahan? Mas dako kining insulto. Mas maayo unta og aksiyonan kini sa kadagkuan sa simbahan kay mas dako kining eskandalo. Aw, kanang mga pari nga bayot sayon ra ang pagsulbad niana. Nganong dili man nila pabalhinon pagka-madre aron moladlad na ila og maayo?

Newspapers in Tagalog

Newspapers from Philippines

© PressReader. All rights reserved.