Konsiyensya sa mga bus operators
Usa ka pari, morag si Fr. Jun Paradiang nga taga Cabadiangan man tingali to, niasoy bahin sa iyang kasinatian sa pagsakay og bus. Maayo ang iyang pagkahimutang sa paglingkod. Mao nga inanay siyang nakatug.
Sa dihang nikalit og brake ang drayber, napugwat siya. Iyang nakit-an nga dihay usa ka tiguwang babaye nga pasahero nga nagbarog lang. Nakahuna-huna siya nga ang maong babaye maoy iyang palingkuron. Apan iya unang gipangutana kon asa siya padung.
Matod pa sa pari, “Asa man ka manaog Manang.” Tubag sa babaye, “Sa hagdan Dong.” Alang sa pari pilosopo ang maong babaye maong wa niya idayon ang iyang gihuna-huna. Natug siyag balik. Nakamata siya sa dihang nanaog ang maong babaye. Pagtan-aw niya, iyang nakita nga didto manaog ang babaye sa atubangan sa Barangay Hall sa Hagdan, sa lungsod sa Oslob.
Ato kining gikutlo tungod kay usa kini ka lawom nga pagtulon-an. Ang tawo dunay konsiyensiya. Apan di tanan mopadayag niini. Ang uban hilom lang pero naghambin sa katarong, kaaghop ug kamaluluy-on.
Mao unta kini ang angay nga ipadayag. Sama sa gihimo sa mga opisyales sa Cebu Provincial Bus and Mini Bus Operators Transport Cooperative (CPBMTC). Ang CPBOA ug ang Cebu Provincial Bus Operators Association (CPBOA) nipetisyon sa Land Transportation Franchising and Regulatory Board (LTFRB) 7 nga umentohan ang pleti.
Gikan sa P6 sa unang lima ka kilometros, himuon na kining P10. Ang matag kilometro nga mosunod, usbawan gikan sa P1.20 ngadto sa P1.50.
Apan ilang gisibog ang petisyon sa umento sa pletihan tungod kay nikunhod man ang presyo sa krudo ug gasolina. Matod pa ni Julie Flores, pangulo sa CPBMTC ug tigpamaba sa CPBOA, makiangayon alang sa mga sumasakay nga ilang isibog ang ilang petisyon sa umento sa pletihan.
Matod pa ni Flores, ang presyo sa diesel fuel karon anaa na sa P38 ngadto sa P42 kada litro. Ang mga bus sa lalawigan sa Sugbo mao ang labing menos og pletihan kon atong tan-awon ang mga bus sa tibuok nasod.
Ang ilang gihimo, ang ilang pagsibog sa petisyon sa umento sa pletihan, nagpakita nga dunay silay konsiyensiya. Konsiyensiya nga ilang gipakita ug wa magpaabot nga mobarato ang presyo sa kamunggay.