Way pinaskuhan sa Pasko
Gidili sa Civil Service Commission (CSC) ang mga nagtrabaho sa gobiyerno ang pag-solicit ug pagdawat og bisan unsang butang o salapi niining panahon sa Pasko.
Naandan na baya kining maong hinatagay panahon sa Pasko. Ang uban mohatag tungod kay aduna silay nakuha ug ang uban nagpaabut pang makakuha og pabor sa nagtrabaho sa ahensiya sa gobiyerno. Anaa usay uban nga mohatag tungod sa panaghigalaay ug way gipaabot nga pabor gikan sa gobiyerno. Apan gidili gihapon kini dili lamang panahon sa pasko kon dili sa tanang higayon.
Kining pag-solicit og salapi o kaha in kind aron ipremyo sa pagahimuong raffles ug ubang gimmick sa Christmas party dili hinuon maayo apan kon gihatag kini tungod sa inyong maayong relasyon, wala man tingali dautan.
Ang tumong ug tuyo sa CSC mao aron dili makapangilkil ang mga nagtrabaho sa gobiyerno. Apan sayud kitang tanan nga mao kini ang praktis labi na gayud panahon sa Pasko. Sukad pa man kaniadto kining maong pagdili unya pila na man ka buok ang nadakpan ug nasilotan nga midawat og pinaskuhan?
Dili ba matag Christmas party sa buhatan sa gobiyerno, apil na sa kapolisan, kapitolyo, city hall ug uban pang opisina- magpasad man ang inasal ug mga ilimnong makahubog nga hinatag sa mga pribadong tawo? Nakadungog ka bag naay naprisong taga-gobiyerno tungod kay nidawat og pinaskuhan?
Alang kanako tugotan nalang unta nga makadawat og pinaskuhan ang mga trabahador sa gobiyerno kay lisud kining i-monitor labi na og adto kini ipadala sa balay sa hatagan. Mangayo usab kini sila sa matag adunay okasyon sa ilang buhatan. Kon balhibuon gyud og kamut sa mga tawo mangilkil gayud kini sila sa sekretong paagi. Anyway, atong monitoron ang mga buhatan sa gobiyerno og di ba magpasad ang lechon ug mga bino nga gikan sa pribadong mga tawo.
○○○
Gisugyot ni Mayor Tomas Osmeña nga umentuhan ang multa sa makalapas sa mga lagda sa trapiko dinhi sa siyudad. Gikan sa karong usa ka libo buot sa mayor nga umentohan kini ngadto sa P3 mil. Uyon sa giingon sa mayor nga gibuhat kini aron magmatngon ang mga drayber sa pagtuman sa mga lagda sa trapiko. Apan kining giingon sa CCTO operations chief miingon nga mo-umento ang P8 milyones nga kita nila matag tuig ngadto sa P16 milyones kapin. Lisud kining tuhoan kay ang mga malapasong drayber dili man mobayad dayon sa multa kon sila madakpan. Dili man gani maka-imbargo sa driver’s license kun citation ticket lang ang ilang i-isyu. Mabayran lang ang multa kon mo-renew na sa registration sa sakyanan ug kon mdisgrasya kini.
Niining tungora, ang operator mao nay mo-abaga sa multa og di ang drayber labi na og mibiya na kini sa operator. Kon na-deputize sila sa Land Transportation Office (LTO) ang Temporary Operator’s Permit (TOP) maoy ilang ma-isyu ngadto sa madakpang drayber. Apan ang multa niini iya sa LTO ug i-deposito sa National Treasury, dili sa panudlanan sa Cebu City.