Without you, life is nothing

SuperBalita Cebu - - SUPER BIBO - OLIVER PEPITO FLORES (Ikaupat sa pito ka mga gula)

Nagparehas lang mo si Yenyen, Rowena, wa moy pulos nga pagka amiga! Nagyawyaw ko nga misunod pagtan-aw kang Rowena dihang misaylo na siya nako. Misamot ang akong kalagot sa duha. Di na gyud sila managad nako.

Aw, kamo na lang bay akong hatagan og bili, uy!

Kusog kong milakaw paingon sa akong classroom. Gikan ko sa canteen niadtong tungora kay snack time ug vacant period nako. Gibuwisit gyud ko niadtong adlawa kay dihang hapit na ko moabot sa akong classroom, gikasugat ko si Ador, mga alas singko imedya sa hapon niadtong higayona, tigsulod ni Ador sa iyang klase. Mao pa tingali pag-abot niya kay kusog man kaayong naglakaw. Nagtapad lang ang among classroom. Last subject nako sa hapon ang maong oras, ug first subject ni Ador kay gabii man ang iyang klase. Nagtrabaho man siya kon maadlaw sa Jollibee.

Usa ka working student si Ador.

Mi-smile si Ador nako. Inay pahiyoman ko sab siya, gikusmoran nuon nako.

“Hi, Ruby.”

Wa gyud nako tagda si Ador bisag mtimbaya siya nako. Bisag wa ko magtan-aw niya, napasiplatan ko siya nga mitutok pag-ayo nako. Kaayo gyung sumbagon sa kanahan, uy! Makalagot gyud ni si Ador. Grabe kaayong motutok nko, morag sa akong paminaw iya kong gihuboan sa iyang panan-aw.

“Nakagusto man gud siya nimo, Ruby.”

Nahinumdom ko sa gisulti ni Yenyen nako. Nakagusto nako? Huh! Wa gyuy lugar si Ador sa akong kasingkasing. Unya nakadesisyon ko nga prangkahan ko si Ador. Mihunong kog lakaw ug giatubang ko siya. Nanighawak ko. Ingon gyud ani ang akong kinaiya kon masuko ko, tinighawakan ko ang tawo nga akong gikalagotan.

“Unsa ba gyuy tumong anang kanunay mong pagtutok pag-ayo nako, Ador?”

Hapit na lang molugwa ang akong mga mata sa kalagot. Gisigahan ko pag-ayo si Ador sa akong mga mata.

“Wa may daotang kahulogan ang pagtutok ko nimo, Ruby. Mi-admire lang ko sa imong beauty. Aside from that, secret love ka nako.” Seryuso kaayo si Ador. “Secret love?” Mikatawa ko, anang katawa nga nagdalag yaga-yaga. “Karon pa lang, Ador, wad-a na kanang pagbatia kay wa gyud kay purohan nga akong higugmaon. Pobre ka!”

Unya nagdali kong mibiya kang Ador.

Newspapers in Tagalog

Newspapers from Philippines

© PressReader. All rights reserved.