5K ka water bottle gihimong Christmas tree
Mokabat 5,000 ka mga recycled empty bottled water ang gigamit aron matukod ang Christmas tree ug belen sa Barangay Tisa, dakbayan sa Sugbo.
Anaa sa ilang ika-lima nga tuig, ang maong barangay gikatakdang mopasiga sa ilang Christmas tree ugmang adlawa, Sabado, Disyembre 8.
Matod ni Barangay Kapitan Phillip Zafra, tuig 2014 gimugna ang Hudyaka sa Tisa diin parte niini ang paghimo og Christmas tree nga ginama sa recycled materials. “Hudyaka sa Tisa was conceptualized to celebrate Christmas for the Tisaanons. It is our way of celebrating the birth of Jesus and to give back to him for the grace received,” si Zafra nagkanayon.
Dugang sa kapitan nga gihimo nila ang Christmas tree lakip na usab ang belen aron pag-awhag sa publiko nga manginlabot sa ilang kampanya sa preserbasyon sa kalikopan.
Matod ni Zafra nga gusto nilang mamahimong role model aron ipadayag ang importansya sa 3Rs o ang “Reuse, Reduce, and Recycle.”
“Those bottles came from our school children from Tisa 2 Elementary School and Tisa National High School and the rest of Tisaanons,” dugang ni Zafra.
Gawas sa pagpasiga sa belen ug Christmas tree, nagkadaiyang kalingawan usab ang dalit sa barangay sa publiko sugod ugma, Sabado. Anaa kilid sa barangay hall sa Tisa ang Christmas Tree ug belen diin instagrammable usab ang wall painting kilid sa belen.