MIKUHA OG SEX VIDEO SA 13 ANYOS

GINIKANAN SA BATA MIREKLAMO, 21 ANYOS NGA CHEF NASIKOP

Nalit-ag sa entrapment operation sa mga sakop sa Mactan Police Station ang usa ka assistant chef sa usa ka restaurant sa Brgy. Maribago, Lapu-Lapu City nga gipasanginlang mi-upload sa iyang sex video sa social media kauban ang usa ka 13-anyos nga dalagita.

Ang dinakpan nailhang si McClark Alvaro Aying, 21, taga Sitio Masiwa, Brgy. Marigondon, Lapu-Lapu.

Gawas kang Aying, gilakip pagsikop sa kapulisan ang kauban niining si Jomel Ceniza Pagalan, 23, taga Mactan proper, apan giingong lumad nga taga lungsod sa Carmen.

Gibutyag ni Anita Jumamil, gender and development officer sa Barangay Basak, nga nagpatabang sa ilang buhatan ang ginikanan ni “Maria” (dili tinuod ngalan) niadtong Martes sa gabii kay aduna kini sex video nga mikatap sa Facebook.

Nangayo kini og tabang unsaon paggukod ang posibleng ni-upload niini.

OPERATION

Dihang gipakita si Jumamil sa video sa inahan ni “Maria” nga matod pa mikatap, dali siyang nakig-coordinate sa Children’s Legal Bureau ug Mactan Police Station alang sa posibleng ipahigayong entrapment.

Kini human nitug-an usab si “Maria” kanila nga si Aying maoy iyang gikahilawas niadtong Nobiyembre 3 sud sa usa ka lawak sa usa ka restaurant nga adunay videoke room.

Si Aying giingong maoy adunay kopya sa ilang gi-record nga sex video.

Giingong kanunay magpadala og mensahe ni “Maria” si Aying sa Facebook Messenger matag karon ug unya human nga dunay nahitabo tali kanila aron tagaan kini og kwarta matod pa alang sa pakighilawas og laing lalake nga mas maguwang pa niini.

Mao usab kini ang hinungdan nganong natigayon ang entrapment operation niadtong Martes sa gabii gumikan kay gikatakdang makigkita na usab unta si Aying kang “Maria”.

Giingong papason ni Aying ang video kon ugaling mosugot na usab si “Maria” nga makighilawas kaniya.

Gisugo usab kini, matod pa, pagdala og laing menor de edad alang sa amigo niini.

“Niadto mi sa Station 2 (Mactan Police) kay didto man sa Maribago gayud sila nag-kuan. Ingon siya sige mag-abot lang ta sa Maribago sa 7-11 ha adto lang didto. Mao to nakuan na dayon. Gisundan nako unya ingon ko, ayaw pahalata ha naa ra mi sa imong luyo. Pagduol na dayon sa lake, estorya sila, saka na sila sa taas (restaurant). Pagsaka nila, naa didto ang usa ka lalake pud unya wa na paggawas ato napusasan na sila duha,” asoy pa ni Jumamil.

DIIN NAGKAILA

Gitug-an sa inahan ni “Maria” nga nahinabi sa Superbalita Cebu nga sa Facebook ra usab nakaila sa iyang anak si Aying ug dali usab nga nahaylo nga makighilawas dihang nakigkita niadtong Nobiyembre 3.

Di masukod ang gibati niyang kaguol ug kauwaw sa pagkakaron tungod sa nahitabo sa iyang anak lakip na ang iyang mga kabanay sanglit wala siya magkuwang sa pagpadako ug pagpahimangno niini unta.

Nabalaka usab siya nga posibleng ma “bully” ang iyang anak sa tunghaan nga moresulta sa pag-undang niini sa pagtungha.

Iyang nahibaw-an nga adunay mikatap nga sex video ang iyang anak sanglit iyang nabasahan sa Facebook Messenger ni “Maria” nga gihisgutan kini sa iyang anak ug ni Aying.

Giklaro niya nga desidido siya nga mosang-at og kaso batok ni Aying aron di na makabiktima pa og laing menor de edad.

NANGHIMAKAK

Si Aying sa iyang bahin mihimakak nga iyang gi-upload ang sex video niya uban si “Maria”.

Giangkon niya nga adunay nahitabo tali niya ug ni “Maria” apan ila kining gikasabotan.

“Wa sad ko kabawo, Sir, kay siya man gud mismo ang nikuan ba, nihatag og kuan ba magbuhat mi ana. Ikaw kuno, Sir, hukaran ka, di pa na nimo kan-on,” pagbutyag ni Aying dihang nahinabi ning mantalaan.

“Dili jud ako ang nag upload. Wa sad ko ka kuan og kinsa kay naa man guy daghan manghilabot sa akong cellphone. Wa man sad ingon gikalat ang video. Murag screenshot ra ba pang blackmail,” dugang ni Aying.

Ang kauban ni Aying nga si Pagalan igo ra usab mibutyag nga miuban ra ni Aying dihang na entrap gumikan kay ila manglaag. /