11 KA ORAS BROWNOUT MOIGO SA SOUTH

Dul-an sa 11 ka oras masinati ang pagkapawong sa kuryente sa Dominggo, Disyembre 9, sa 15 ka mga lungsod ug siyudad sa habagatang bahin sa lalawigan sa Sugbo nga ubos sa franchise areas sa Cebu 1 Electric Cooperative, Inc. (Cebeco).

Tungod sa pagkapawong sa sugang-dagitabnon, maapektuhan usab ang pag-supply og tubig sa Carcar Water District ngadto sa mga konsumedor niini sa walo ka mga barangay sa siyudad.

Si Sonon Dakay, radio tender sa Cebeco 1, nipahibawo nga nunot kini sa himuon nga pag-ilis sa lata nga mga poste sa 69 kilovolts nga linya gikan sa Naga hangtod sa Sibonga.

Matod niya, magsugod ang power service interruption sa alas 7:30 sa buntag sa Dominggo hangtod sa alas 6 sa gabii.

Ang mga dapit nga maapektuhan naglakip sa tibuok siyudad sa Carcar, mga lungsod sa Sibonga, Argao, Dalaguete, Alcoy, Boljoon, Barili, Dumanjug, Ronda, Alcantara, Moalboal, Badian, (gawas sa Brgy. Matutinao) Malabuyoc (gawas sa Brgy. Cerdeña) Alegria (gawas sa Brgy. Inghoy, Valencia) San Fernando (gawas sa mga Brgy. Balungag Tubod ug bahin sa Tabionan).

Sa opisyal nga pamahayag sa Cebeco 1, mahimong masayo ang paghuman sa pag-ilis sa mga poste bisan sa gitakda nga oras.

Apan mahimo usab kini malangay kon dunay mga sirkumstansya nga dili malikayan nga mahitabo.

Samtang, gumikan sa pagkapawong sa kuryente, maapektuhan ang supply sa tubig sa Poblacion 1, Liburon, Can-asujan, Perrelos, Tuyom, Valladolid, Ocaña, ug Guadalupe.

Sa advisory sa CWD, kini niawhag sa mga konsumedor sa maong mga lugar nga magpundo daan og tubig karong adlawo tungod kay hinay ngadto sa way agas ang gripo sa nahisgutang mga dapit. /