MODERNONG PUV GIUYONAN NA

SuperBalita Cebu - - FRONT PAGE -

Nihatag na og pagtugot si Mayor Tomas Osmeña ngadto sa Persano Corporation, operator sa 40 ka bag-ong

public utility vehicle (PUV), nga maka-operate sa dakbayan sa Sugbo.

Si Francisco Ouano, operations head sa Cebu City Transportation Office (CCTO), nagkanayon nga nitawag kaniya si Osmeña niadtong Disyembre 1 ug nimando nga ipadali ang mga rekisito aron makasugod na og pamasahero ang air-conditioned nga bus/jeep (beep).

Gipahibawo sa operations head sa CCTO nga nakita sa mayor ang kamahinungdanon sa maong mga beep gumikan sa kadaghan sa mga pasahero nga maghuwat sa karsada.

Una niini, ang Persano Corps gipangayoan sa CCTO og written approval gikan sa Office of the Mayor human sila gihatagan og 90 ka adlaw nga provisional authority sa Land Transportation Franchising and Regulatory Board (LTFRB) 7.

Ang beep nga ginama gikan sa Russia makakarga og 30 ka pasahero samtang 34 ka pasahero apil na ang mga mag-barog.

Si Ouano nagkanayon nga sa matag rota sa beep, adunay 10 ka stops diin adto monaog ug mosakay ang mga pasahero matag adlaw.Ang operasyon sa mga beep 24 oras.

STOPS

Naglisod nag CCTO sanglit gusto sa Persano nga mogamti sila sa PUJ stops nga napanglantawan ni Ouano nga makamugna og dugang kahuot sa trapiko.

Ila kining gipangitaan og kaugalingong stops.

Ang matag rota adunay 20 ka beep diin ang unang rota magagikan sa Cebu City Hall, Robinsons Galleria paingon ngadto sa Cebu Business Park largo sa Asiatown IT Park ug vice versa.

Ang laing 20 ka beep manukad sa south district, gikan sa Paseo Arcenas sa sityo Banawa paingon sa Happy Valley, B. Rodriguez, Fuente Osmeña, Ramos, D. Jakosalem, Gorordo Avenue, Ayala Center Cebu, Panagdait sa Mabolo ug Sykes Philippines sa F. Cabahug ug vice versa.

Aduna kini biyahe matag 30 minutos.

IDUSO SA COUNCIL

Ang rekomendasyon sa CCTO iduso ngadto sa buhatan ni Konsehal Dave Tumulak ug Konsehal Eugenio Gabuya Jr., aron sila na ang moduso sa City Council para sa pagpasar og resolution para mahatagan sila og 45 ka adlaw nga provisional authority.

Si Tumulak niingon nga wa silay regular session karong Martes sunod semana gumikan sa Philippine Councilors League.

Human sa usa ka buwan ug tunga, ang CCTO mohimo og pagtuon kon angay ba silang hatagan og travel line para regular na silang makapamasahero.

GIHANGOP

Nalipay si Atty. Vigor Mendoza, chairman sa Persano Corporation, nga nihatag na og pagtugot si Osmeña nga maka-operate na sila og sugod sa 40 ka Beep (Bus-jeepney) units dinhi sa siyudad.

“Kung mayroon na, nagpapasalamat tayo para masimulan na natin itong modernization coz I’m sure yung commuters natin eh sabik na sabik na gumanda naman ang kanilang travel experience,” pahayag ni Mendoza dihang nahinabi sa Superbalita Cebu sa Biyernes, Disyembre 7.

Matod niya, gihan-ay na nila ang baseline alang sa mamahimong sweldo ug incentives sa mga drayber nga magagikan sa Cebu Integrated Transport Service Multi-purpose Cooperative (Citrasco).

Newspapers in Tagalog

Newspapers from Philippines

© PressReader. All rights reserved.