2 ka suspek sa pagpatay sa magtiayon mitahan, miangkon sa ilang krimen

Nadakpan sa Alicia police station ang duha ka mga suspek sa pagdunggab patay sa magtiayon ug pagkaangol sa 12 anyos nga sinagop niini sa Barangay Langkas, lungsod sa Dalaguete niadtong Disyembre 3.

Silang Antonino Jabagat, 45, ug pag-umangkon nga si Alejandro Jabagat, 25, nasikop sa sitio Sunnybrook, Barangay Poblacion sa mao nga lungsod, lalawigan sa Bohol pasado alas 6 sa gabii sa Disyembre 6.

Matod ni Inspector Georgie Sarabosing, hepe sa Alicia police station, nga ang kabanay sa asawa ni Atonino nga maoy gisak-an sa uyoan ug pag umangkon nidangop sa ilang buhatan aron itahan ang duha.

Gisusi una niya kon ang gipasabot sa concerned citizen mao ba ang gipangita sa Dalaguete police station.

Sa dihang nakompirmar, ila dayon kining giadto ug gipasurender.

Malinawon hinuon nga nikuyog sa mga pulis ang duha ug niangkon sa krimen.

“Pag-abot namo didto, Sir, misurender ra man sila dayon nya niangkon nga sila gyud ang nag patay atong magtiayon sa Dalaguete,” matod ni Sarabosing.

NGANONG GIPATAY

Si Antonino nga nahinabi sa Superbalita Cebu, niangkon nga ang una niyang napatay ang asawa nga si Ana Maria Grace Ramos tungod kay giyawyawan siya sa dihang nanghuwam og P5,000.

Matod niya nga nihangyo siya sa magtiayon nga mohuwam og kwarta aron ipatambal sa iyang igsuon nga dakong masakiton, apan gipasakitan siyag estorya.

“Wala pa unta ko masuko ana, Sir, pagka ingon na niya nga dili ka man taga diri, nganong mangutang man ka? Usik ka lang sa kwarta. Dili ka makabayad kay dayo ka lang dinhi mao to murag wala ko sa akong kaugalingon, Sir, giluba gyud nako. Wala na ko kahibawo,” asoy ni Antonino.

Human nila mapatay ang magtiayon, nanguli sila sa ilang balay ug mikuha sa ilang sapot ug nagpahatod sa iyang maguwang sa Poblacion aron mosakay sa bus.

Iyang gidugang nga naabot sila sa syudad sa Sugbo aron mosakay barko paingon sa Tubigon.

‘WA MANULIS’

Gihimakak niya nga ilang gikuha ang kwarta sa mga biktima nga unang gibalita nga nakadala kinig dakong kantidad.

Matod ni Antonino nga kon nakadala pa sila og kwarta, dili na sila magpadakop kay milarga na sila sa Manila.

“Kay kon nakakuha pa mi, Sir, diretso pagka estorya kon nakakuha pa lang kami bisag P20,000 lang, dili na gayud kami makita kay Manila na mi,” dugang ni Antonino.

Gilimpyohan usab ni Antonino ang pangalan sa iyang maguwang nga si Vicente nga gitanggong sa Dalaguete police station human masuta nga kini ang naghatod sa Poblacion aron pasakyon og bus.

SULBAD NA

Matod niya nga walay kalibutan ang iyang maguwang nga nakapatay sila sa ilang silingan.

Sa maong kalamboan gikonsiderar na sa Cebu Provincial Police Office nga sulbad na ang kaso sa pagpatay sa magtiayon.

“Masasabi po nating case close na ito right after the case ay ma ifile na natin sa korte,” matod ni Sr. Supt. Manuel Abrugena.

Dako og natabang sa imbestigasyon ang pamahayag sa 12 anyos nga sinagop sa mga biktima nga nakaeskapo, matod ni Abrugena.