PRO 7 moapil sa Sinulog?

SuperBalita Cebu - - SUPER BIRADA -

Wala pa man tuod mohibaw-i kon pila ka buok, apan gipanglantawan nang daan nga ubay-ubay gyud nga mga contingent ang mosalmot sa umaabot nga Sinulog sunod tuig. Basi sa mga nangagi, basta Sinulog na gani daghan gyung taga laing lugar ang madasig ning maong relihiyusong kalihukan ilabi na og ila na kining tradisyon o ilang pangilin sa matag tuig.

Si Cebu City Councilor Dave Tumulak mibutyag nga sa unang higayon dunay contingent nga taga laing nasod apan isip usa lang ka guest performer.

Gitumbok ni Tumulak mao ang grupo gikan sa Wonju, South Korea nga mikomiter nga mosalmot sa grand parade.

Ato ning gihangop kay nakapadugang kini sa international exposure sa Sinulog. Kinsay nasayod nga duna pa unyay ubang nasod ang mosunod.

Makapalig-on usab kini sa relasyon tali sa Pilipinas ug sa maong nasod.

Pero dili lang diay ang South Korea maoy first timer sa Sinulog sunod tuig. Sa unang higayon, moapil usab diay ang Police Regioal Office sa Central Visayas sa mga kalihukan sa maong festival.

Kini maoy atong gikabalak-an kay kon mangapil sila buot ipasabot nga makuhaan ang ilang puwersa nga mobantay ug mopakgang sa binuhatan sa mga dautang elemento nga mopahimus usab sa kahigayonan. Dili kaha magpiyesta na hinuon ang mga badlungon niining panahona?

Salikwaot paminawon nga samtang ang ilang kaubang nagbantay alang sa kalinaw atol sa kalihukan, pipila usab kanila ang nagsigi og sayaw-sayaw sa Sinulog.

Lantawon unta ni Sinas nga ang prayoridad sa kapulisan niining higayona dili ang pag-apil sa selebrasyon kon dili ang paghatag og saktong kasiguroan sa mga tawo ug pagpatuman sa kahapsay ug kalinaw. Mahimong mogahin na lang og laing adlaw kon gusto nilang magselebrar sa Sinulog.

Newspapers in Tagalog

Newspapers from Philippines

© PressReader. All rights reserved.