Christmas party nga di pinugsanay

Sayo nga mag pasko ang mga tinun-an sa mga publikong tunghaan human gipahibalo sa DepEd nga kutob nalang karong semanaha ang ilang klase.

Sama sa naandan ang mga ginikanan magka puliki labi na kadtong apiki sa badyet pag-andam sa mga galastuhan kay si dodong o si inday mag Christmas party sa ilang eskwelahan.

Ang polisiya sa DepEd klaro kaayo. Way pinugsanay, way catering ug way amotan nga mahitabo.

Sa ato pa, ang mga bata magdala ra og pagkaon isip tampo. Kong naa may maestra o maestro nga mo-assign og pagkaon dako na nga kalapasan sa lagda.

Samot na kong magpa amot. Ang espiritu sa pasko di man gud daugon sa ka lami ug ka daghan sa putahe.

Ang importante nga magkahiusa ang mga bata ug masabtan ang tinud-anay nga kahulogan sa pasko. Dili ang gara gara. Bisan sa mga private school.

Mas nindot nga makakat-on ang mga bata og unsay pinobre o yano nga selebrasyon. Unya kamo sang mga bata ayaw mo palabi sa inyong gibati.

Ayaw pugsa ang inyong ginikanan pagpa gasto.

Ang pait ra ba inyong ipasangil sa inyong sir o mam bisan kong wa sila magsulti nga naay amotan.

Di ba tinuod? Ka daghan na ni mahitabo nga ang magtutudlo maoy ipasangil. Mag Christmas party ta nga way tigpatanto nga maningil unyag ka ugma.

Nisakay ko og dyip para North reclamation area sa dakbayan sa Sugbo niadtong Huwebes.

Sa front seat ko nilingkod. Pag agi namo sa dalan Colon may bata nga nagsyagit daplin sa karsada. Gihunongan sa driver ug gitunolan og 5 pesos.

Unya nidagan ang bata padung sa aseras. Ang driver nga nagpaila nga si Alfonso Magdasal, 59 anyos, nitug-an nga ang maong bata tulo ka bulan na nga iyang gisagop kay wa nay inahan apan gikuha sa amahan ug gikuyog sa pagpaninda aseras.

Matod ni Alfonso nalooy siya sa bata nga ang ngan si Jerico, 3 anyos, mao nga kauban ang iyang asawa nga si Aida ila ning gipapuyo sa ilaha diha sa Upper Pailub Barangay Sambag 1, Cebu City.

Gawas kang Jerico duna pay laing tres anyos nga si Dongky ang iyang gipakaon tungod kay wa na say inahan nga mag-atiman.

Si Dongky mag-ulian hinuon sa ilaha matag gabii. Ang tawag sa mga bata niya kay papa ug mama ngadto kang Aida.

Silang duha giisip ra sab ila nga ilang mga anak. Sa panahon karon labi na kay pagpamasahero ray gisaligan ni Alfonso lisod ning daghan ka og palamyon.

Pero kong gugma inubanan sa kalooy na gani ang maghari sama sa gibuhat ni Alfonso ug Aida way tiyan nga magkutoy.