Mangutang ang Mandaue
Nahimugso ang damgo sa bag-ong Government Center sa Mandaue panahon ni Mayor Jonas Cortes sa 2014.
Tukoron sa luna nga gipanag-iya sa dakbayan nga ipaagi sa Public-Private Partnership (PPP) aron walay gasto ang gobyerno.
Sa PPP ang pribadong kompaniya maoy moabaga sa kinatibuk-ang proyekto.
Tagaan og prayoridad ang mga opisina sa kagamhanan sa Mandaue ug paabangan ang kasikbit diin adunay pahat sa renta ang siyudad. Mahingpit ang pagpanag-iya sa Mandaue sa maong Government Center inig kapupos sa kontrata agad sa kasabotan.
Aduna nay pribadong kompaniya nga andam motukod sa maong proyekto. Ang daang city hall nga ginganlan og Presidencia himoong musoleyo. Laing tinguha ni Cortes sa iyang pagbalik ang gisaad nga Global Central Project ug 20 ektaryang reclamation sa Umapad sa gahin nga 800M pesos.
Apan ang PPP gisalikway sa kasamtangang adiministrasyon ni Mayor Luigi Quisumbing. Maoy tuyo nga mangutang sa bangko og 1.5B pesos pagtukod sa Governmant Center.
Kini may bayranan nga tubo o interest dalang principal nga mokabat og 130M pesos matag tuig. Ang tubo moabot sa 500M sa 15 ka tuig nga tagal sa pag-impas og bayad. Mohigot sa 20 porsento sa Internal Revenue Allotment (IRA) o 120M pesos matag tuig.
Mahikawan o maapekto- han ang batakang serbisyo sa panglawas, edukasyon ingon man social pension sa mga senior citizens, persons with disabilities, solo parents, uban pa. Maoy mabuktot og bayad ang mga magbubuhis.
Dunay pangagpas nga aron dili maapsan sa election ban gidali ang pagsubasta ug paglaktod sa proseso. Sa miaging Nob. giingong mao pay pagpirma sa Omnibus Term Loan Agreement tali sa bangko ug Quisumbing. Tataw nga pagsubasta wala pay tino nga tinubdan sa pundo.
Hinoon ang mga Mandauehanon maoy mopinalisar sa ilang paglusad og hukom,. Eleksyon na ra ba sa Mayo 13, 2019. Nag-atbang sila Cortes ug Quisumbing human miaslom ang ilang politikanhong relasyon.
Ang grupo ni Cortes nga gilangkoban sa mga lumad sa Mandaue gipaluyohan ni Pres. Rodrigo Duterte sa PDP-Laban samtang ang grupo ni Quisumbing gipaluyohan ni Davao Mayor Sara Duterte sa Hugpong Ng Pagbabago (HNP).
Natakdan si Gov. Jun-jun Davide nga nangutang sa bangko og 1.5B pesos magtukod og 20-storey Provincial Resource Center sa Capitol compound. Gibunyagan og Tore ni David-de nga gausik lang sa kwarta kay pwede raman ipaagi sa PPP. Mipasidaan usab ang National Heritage Commission nga likayan ang pagtandog sa hulagway sa kapitolyo kay gideklarar nga National Heritage Landmark sa 2008.