Without you, life is nothing
Kanunay na kong saputon. Dali ra kong masuko. Bisag way nahimong sayop ang among katabang, kasaban ko sila. Ug usa ka gabii, gisulod ko ni Mama sa akong kuwarto. Milingkod siya ngilit sa akong kama. “Ruby, mag-estorya ta.” Seryuso si Mama. Hinay ang iyang tingog. Ingon gyud siya ani, hinayon og tingog. Buotan si Mama, ingon man si Papa. Mibangon ko. Misandig ko sa headboard sa akong kama. Nahibulong ko. First time pa nga misulod si Mama sa akong kuwarto, ug anhi siya makigsulti nako.
“May problema ba, Ma?” Seryuso sab ko. Nagtuo ko ga nag-away sila si Papa. Apan dunay mga higayon nga namatikdan ko ang akong mga ginikanan nga dunay gibating kahiubos sa usag usa apan wa gyud mahitabo nga misumbong si Mama ani nako.
“Wa koy problema, Ruby. Ikaw ang dunay problema.”
“Ako may problema, Ma?” Mikatawa ko. “C’mon, Ma. Ngano gud tawon nga nakaingon ka man nga duna koy problema? Wa koy problema, Ma, uy.”
“Duna kay problema, Ruby. Di kini ikatago tungod sa kinaiya nga imong gipakita karon. Now, tell me kon nganong kanunay kang masuko karon?”
Nahilom ko. Miginhwa ko pag-ayo. Nakaduko ko. Di ko makatan-aw og diresto kang Mama.
“Duna gyud kay problema, Ruby. Dunay naghasol nimo.”
Miginhawa na sab ko ug mitan-aw og kadiyot kang Mama. Nakadesisyon ko nga tug-anan ko si Mama sa tanan.
Gikuptan ni Mama ang duha ko kamot.
“You know, Ruby. Akoy nakapahuman ni Papa nimo sa pag-eskuwela. Parehas nimo bugtong sab kong anak. Mao bitaw nga ako ra ang nakasunod sa tanang katigayonan sa akong parents. Bisag dato mi pero di mi mata-pobre. Buotan kaayo sila si Mama ug Papa. Mapinanggaon sila sa mga pobre.”
“Ikaw day ang naggasto sa pag-eskuwela ni Papa, Ma?” Nakalitan ko sa confession ni Mama.
“Oo, Ruby. Nahitabo ni kay nagminahalay man mi. I love your Papa very much, and he loves me, too. Wa siya magapas sa among katigayonan. Nasuta ug natugkad ko gyud ang kadako ug katinuod sa iyang paghigugma nako.” Nahilom ko.
“Ayaw usiki ang imong pagpakabuhi sa ngil-ad nga kinaiya, Ruby.”
Nagpahiyom na si Mama, dayon niyang gawas sa akong kuwarto.