JAGUARS VS. WEBS
USPF Panthers makigbatok usab sa SWU Cobras sa Minglanilla
Mga duwa karon:
6:00 pm. Minglanilla vs. Balamban (Exhibition game) 7:30 pm. - USPF vs. SWU 9:00 pm. - USJ-R vs. UC Hugot nga panagkombati maoy masaksihan karong gabii sa dihang magtakos gilayon ang Cesafi 2018 runner-up University of San Jose Recoletos (USJ-R) Jaguars ug 2017 Cesafi finalists University of Cebu (UC) Webmasters sa main game sa opening day sa 1st Minglanilla Mayor’s Cup Inter-collegiate Christmas league sa Minglanilla Sports Complex, dakbayan sa Sugbo.
Gipaabot nga posibling moparada og bag-ong import ang Webmasters sa ilang pagpakigsangka sa Jaguars kinsa adunay higanting reinforcement nga si Tochukwu Ewenike.
Hinuon 80 porsiyento sa mga Webmasters ang pabiling intact nga gipangulohan ni kanhi Mapuag Cardinals guard DarRY Shane Menina ug Justine Dacalos
Gawas kang Ewenike, si Jaguars coach Leodie Garcia mosandig usab sa iyang mga locals nga sila si slam dunk artist Miguel Gastador, J Dinolan, Fletcher Galvez, John Ubalde, ug Ricky Peromingan. Wala ang ilang star player nga si Jaybie Mantilla kinsa atoa na karon sa Cebu City Sharks sa Maharlika Pilipinas Basketball League (MPBL).
Ang University of Southern Philippines Foundation (USPF) Panthers mosuway usab sa katakos sa Southwestern University (SWU)-Pinma Cobras sa preliminary game.
Sa dili pa ang proper tournament, usa ka special match tali sa Minglanilla Archangels, ang unang kampiyon sa Cebu Governor’s Cup 21-years below tournament, makigsangka sa Balamban Squad sa alas 6 sa gabii.