BOSTON MIDAOG; IRVING NAANGOL
Mitali og 22 puntos si Kyrie Irving , midugang og 19 si Al Horford kinsa milangkat usab og 12 ka rebounds, ug ang Boston Celtics yanong milubong sa New York Knicks, 128-100, sa National Basketball Association (NBA) kagahapon.
Apan mibiya ug gipagawas sa Irving sa korte sa naghinapos nga bahin sa duwa tungod kay nakaangkon na usab kini og angol sa iyang abaga.
Samtang sa pagbalik ni Jaylen Brown human wala makaduwa og tulo ka higayon, mipakatap kini og 21 puntos, laing naka double figure nga may 17 puntos si Jayson Tatum alang sa Celtics nga mikutlo sa ilang ikaupat nga sunodsunod nga kadaugan.
Kadto maoy ikaupat usab nga kapildihan sa Knicks sulod sa uwahing lima ka duwa.
Si Tim Hardaway Jr. mipuga og 22, Enes Kanter naka 14 alang sa Knicks. Sa sunod nilang duwa, ang Celtics mobisita sa Chicago Bulls samtang ang Knicks mohost sa Brooklyn Nets.
Sa laing duwa, gipanglu- bong sa Utah Jazz ug Portland Trail Blazers ang ilang tagsatagsa ka mga kontra.
Ang host Jazz ningpatugpa sa Houston Rockets, 118-91, pinaagi sa pagpangulo ni Derrick Favors, kinsa nipupo og 24 puntos ug 10 rebounds.
Ang Jazz mingsaka sa 13-13 nga rekord samtang ang Rockets nangahagsa sa 11-13 nga baraha.
Sa Portland, ang Trail Blazers ninglampornas sa Phoenix Suns, 108-86.
Ang Trail Blazers ningbulhot sa 14-11 nga rekord samtang ang Suns ningsawop sa 4-21.