SHABU MIBARATO OG MAAYO

BISAN SA SUBSOB NGA MGA RONDA; KAPULISAN DUNAY DUHA KA TEYORIYA

Mitibugsok pag-ayo karon ang balor sa illegal nga drugas sa Central Visayas itandi sa nanglabay nga mga buwan.

Karon, ang presyo sa matag gramo sa shabu mokantidad na lang sa P6,800 itandi sa P11,800 kaniadto, sigun sa Dangerous Drugs Board (DDB) value.

Mas grabe ang kabarato sa shabu sa Metro Manila.

Duha ang posibling hinungdan niini, matod ni Sr. Superintendent Royina Garma.

Kini nagpasabot nga daghan kaayo ang supply sa drugas sa Rehiyon 7. Ikaduha, posibleng gipaubsan sa mga drug lords ang ilang presyo aron mahurot na ang ilang supply.

Kini taliwa sa subsob nga mga anti illegal drugs operation sa kapulisan.

“Pwede mo siyang i-interpret in so many ways. Like pwede mong sabihin na maybe because maraming supply. Pwedeng ganun. So, bargain na lang.

Pwede ring ibinaba kasi yung nasa itaas gusto nilang i-dispose kaagad para mawala sa custody nila kasi intensified yung operation ng pulis,” matod ni Garma. Dugang niya nga kon anaa sa mga kamot sa drug personalities ang drugas, taas ang posibilidad nga mabutang sila sa peligro nga madakpan sa paghingusog sa ilang kampanya.

Tungod niini, nangitag paagi ang mga iligalista nga mabaligya sa barato nga presyo aron dali ra nga mahurot, matod ni Garma. Nakurat pa ang CCPO director sa gitug-an sa Philippine Drug Enforcement Agency (PDEA) nga didto sa kaulohan ang gramo sa shabu sa maong lugar tag P1,500 na lang.

Napanglantawan nga mo saka pa ang supply niini karon ilabi na nga nagkaduol ang Pasko ug Bag-ong Tuig.

Tungod niini, gipasalig ni Garma nga di sila mohunong sa ilang kampanya pagbatok sa illegal nga drugas. ONE TIME, BIGTIME

Padayon pa ang pagdagsa sa

illegal nga drugas sa Central Visayas human makasakmit ang kapulisan sa kapin P16 million nga balor sa illegal nga drugas atol sa One Time Big Time operation sa Police Regional Office 7, diin P13 million niini nakuha sa syudad sa Sugbo.

Ang Cebu City Police Office nakakuhag 1,976.80 gramos sa gituohang shabu nga gibana-bana nga mobalor ang tanan og P13,442,240 sud lang sa 48 oras nga dungan nga anti drug operation.

Sa probinsya sa Sugbo, nakasakmit usab silag 201.67 gramos nga mokantidad og P1,371,356. samtang sa Bohol nakakuha usab silag kapin sa P1.3 milyunes nga balor sa shabu. Matod ni Garma nga sa 11 ka search warrants nga giisyu sa korte, walo lang niini ang napatuman samtang 26 ang ilang buy bust operation inay ang plano 16 lang. Iyang gipasabot nga atol sa nagpadayon nga buy bust, adunay mga follow up operation nga gihimo nunot sa gipangtug-an sa ilang mga dinakpan kon asa sila magkuhaan sa ilang supply sa illegal nga drugas.

Duha ka mga operation ang nakakuhag dinagko nga supply.

Kini mao ang buy bust sa Drug Enforcement Unit (DEU) sa CCPO sa N. Bacalso corner Tres de Abril nga moabot sa 505 gramos sa gituohang shabu nga mo balor sa P3,434,000.

Nasikop niini si Freddie Briones, 38, taga sitio Cabancalan 1, Barangay Bulacao. Samtang ang ikaduha nga operation mao ang Pardo police station sa sitio Laray, Barangay Inayawan nga nakasakmit silag 725 gramos sa shabu nga mobalor ang tanan og P4,930,000 diin ang nadakpan giila nga si Christian Lloy Arrogante, 19.

Moabot usab sa kapin 50 ka mga tawo ang nangadakpan ug lima ka armas ang ilang na imbargo gikan sa mga nalambigit sa illegal nga drugas.

Tulo ang nakalas nga gipasanginlan nga misukol sa mga pulis, usa niini sa syudad sa Lapu-lapu, Mandaue ug syudad sa Talisay. /