Training ug disiplina

SuperBalita Cebu - - SUPER BIRADA -

Naa karoy balaudnon sa Senado alang sa mandatory nga training sa mga tigmotorsiklo tungod kay kadaghanan sa mga aksidente sa kadalanan dinhi sa nasod, naglambigit og scooter ug motorsiklo. Dinhi lang sa Sugbo, gatusan ka mga aksidente ang naglambigit og motorsiklo matag buwan. Sa nasod, labing minos 4 million ang mga aksidente sa motorsiklo matag tuig. Makapangutana ka kon ngano kaha ni? Tungod ba kaha sa kakuwang sa training o kakuwang sa disiplina?

Tingali, tungod sa duha. Daghan sa mga tigmotorsiklo kuwang og kahibawo sa balaud ug kuwang sa disiplina. Daghan ang wa masayod sa balaud tungod kay daghan ang way lisensya ug bisan way igong training, basta kahibawo lang mopadagan, momaneho na.

Naa say organisadong mga driver nga gipailawom sa seminar ug training ang members, apan nagpatuyang gihapon sa pagpadagan. Kini tungod kay sa karsada, kuwang ang pagpatuman ug tigpatuman sa mga balaud. Mao nang daghan sa drivers kuwang og disiplina.

Di usab kalikayan nga managhan ang mga aksidente sa motorsiklo tungod kay nagkadaghan ang mao nga sakyanan sa kadalanan tungod sa suliran sa trapiko nga grabe na kaayo. Nagkadaghan ang mao nga matang sa sakyanan, nagkadaghan sab ang nagkinabuang sa pagpadagan.

Kon ipatuman ang speed limit, pinaagi sa pag-invest o pagpamalit og mga ekipo alang sa higpit nga pagpatuman niini, makita ang maayong resulta.

Gikinahanglan ang training sa mga nagmotorsiklo, apan kinahanglang kuyogan usab kini sa pagpatuman sa mga balaud sa trapiko. Mao baya ni ang sakit sa daghang mga Pinoy, wa gani ang mga tigpatuman sa balaud, lapason gyud kini.

Sama sa ginaingon nga "kon wa ang iring, ang ilaga magduwa-duwa."

Newspapers in Tagalog

Newspapers from Philippines

© PressReader. All rights reserved.