Pagtukod sa DDS

Wala ko makasimba ug makakalawat kon unsa ang ana sa huna-huna ni Presidente Rodrigo Duterte kabahin sa iyang plano nga motukod og usa ka armed civilian group nga pagatawgon og Duterte Death Squad (DDS) aron maoy mo-counter sa Sparrow Unit, liquidation squad sa New People’s Army (NPA). Ang Sparrow Unit maoy mopatay o mo-assassinate sa mga gustong patyon sa NPA sa mga urban areas.

Kining maong grupo maoy gikahadlukan sa militar ug kapulisan kanidtong dekada 70 ug 80. Bisan dinhi sa dakbayan sa Sugbo naka-operate ang maong grupo diin daghang mga pulis ang ilang napatay. Unsa may tumong niini? Aron adunay ‘balance of terror’? Unsa man diay pulos sa atong militar ug kapulisan labi pa sa ilang mga tagsa-tagsa ka mga intelligence unit? Ila man kanang trabaho sa pag-ila ning maong mga tawo, dakpon ug pasakaan og kaso. Aw, kon mosukol anha na patyon.

Unya tugutan nga makahupot og armas kining maong grupo? Diha na ang kuyaw nga daghang kalapasan sa tawhanong katungod nga makomiter sama sa mga armed group nga mi-abag sa militar ug kapulisan sa anti-insurgency campaign. Daghang civilian armed groups ang gigamit sa militar kaniadto sa anti-insurgency campaign sama sa Civilian Armed Forces Geographical Unit (Cafgu), civilian volunteers, Alsa Masa ug Kuratong Baleleng Gang.

Anaa pa gihapon ang Cafgu karon labi pa sa kabukiran nga gihugpaan gihapon sa insurgency. Apan mao lagi daghan ang mga abuso kay bisan dili mga rebelde ilang pamatyon. Ang Kuratong sa dihang wala na ma-control sa militar nahimo nang sindikato diin nahilambigit na sa mga pagpanulis og mga bangko, kidnapping o illegal nga drugas.

Ang unang mipadayag og pagsupak ning maong plano mao ang Commission on Human Rights (CHR) kay lagi motumaw ang mga human rights violations. As usual, ang mga militante ug progresibong grupo dako usab nga supak. Bisan gani ang kadagkuan sa militar ug kapulisan nagduha-duha ini. Ambot unsa ning utok aning Digong, dili masabot. Ato na lang i-abolish ang militar ug kapulisan ug magtukod na lang og DDS.