Without you, life is nothing
Sukad nga gisuginlan ko ni Mama sa ilang kaagi ni Papa ug sa ilangmaayong kinaiya, morag gihasol na ang akong hunahuna. Sa akong paminaw, morag nag-inusara na lang ko. Nawad-an kog duha ka suod nga amiga, ug si Ador mahunahuna ko na sab.
Naunsa na man nuon ko? Di ba naglagot man ko kang Ador? Apan nganong mahunahuna ko na man siya karon? Ug sila si Yenyen ug Rowena, di ba naglagot man sab ko nila kay gihilabtan nila ang akong kinaiya?
Apan nganong di man sila mawala sa akong hunahuna?
Gusto ko nga magkabalik ang maayo namong pagtinagdanay ni Yenyen ug Rowena. Gimingaw na ko sa among panag-uban. Gihandom ko ang mga happy moments namong tulo. Gusto kong moduol nila aron magkauli ang maayo namong kabubut-on. Apan no way! Misupak ang akong hunahuna. Di ko ipaubos ang akong pride. Kasuwerte nila, no, nga magpaubos ko nila? Na, unsaon na man lang ang akong garbo, ang akong pagka tawo?
Nagmagahi gyud ko. Sa matag higayon nga magkita mi si Yenyen o kaha si Rowena sa eskuwelahan, di gyud ko motagad nila bisag namatikdan nako nga morag maayo na sila nako. Duna pa gani higayon nga mo-smile sila nako kanang magkasugat mi. Apan pinataas gihapon ang akong agtang ug magkusmod ko.
Ug si Ador? Di ko siya gustong hunahunaon apan di gyud nako kalikayan nga mahunahuna ko siya. Kadaghan ko na siya pasakitig sulti. Ug nagtuo ko nga mohunong na siyag pagpabatyag sa iyang paghigugma nako. Kanang magkita mi sa eskuwelahan mahapon, kanunay ko niyang tan-awon pag-ayo. Gusto niyang ipaabot nako ang dako niyang paghigugma nako pinaagi sa iyang tinan-awan nako.
Ug usa ka gabii, samtang nagtuon ko sa akong leksiyon sa sulod sa akong kuwarto, gitawag ko ni Mama. Namisita si Ador nako. Gipugos gyud ko ni Mama nga atubangon si Ador. Seryuso kaayo ang karaho samtang nag-atubang mig lingkod sa sala.
“Ruby, I know nga naglagot gyud ka nako kay pobre lang ko. Pero ikaw ra gyud ang babaye nga akong gimahal.”
Nahibulong ko sa akong kaugalingon. Morag nalipay ko nga gidaygan ko ni Ador sa unang higayon sa iyang gugma nako. (TAPUSON SUNOD GULA)