Pinaskuhan ni Krista

SuperBalita Cebu - - SUPER BIBO - EDGAR J. SUMAGANG Buagsong, Cordova, Cebu

Andam na ang magtiayon ning Dominggo sa buntag. Karong adlawa mao ang ilang gikasabutan nga mamalit og mga pinaskuhan alang sa ilang mga kinugos ug sa ilang kabanayan. Sa Disyembre 25 sunod semana mao na ang adlaw sa Pasko. Samtang nagdagan ang ilang kotse subay sa dalan nga maghatod kanila sa kinapusoran sa siyudad, libang kaayo ang mga mata ni Krista, utso anyos ug kinamanghuran nilang anak nga ilang gikuyog. Nalingaw ang bata sa nindot nga dayan-dayan sa Pasko nga gipangladlad ug gipanghayhay sa masigka daplin sa dalan. May nagkalainlaing porma sa parol, mga krismas tre sa nagkadaiyang gidak-on ug may nagkipatkipat nga sugang dagitabnon nga mobuga og de-kolor nga kahayag.

Wa madugay namidpid ug mihunong ang ilang sakyanan sa aseras nga nahatungod sa dakong mall. Sa ilang pagkawas maoy miukiok sa ilang dalunggan ang nagkalandrakas nga mga paskuhanong awit gikan sa mga tindahan sa aseras. Ang diwa sa maong mga awit nanuhutsuhot sa tagsa-tagsa nila ka galamhan. Wa kaayoy daghang tawo sulod sa mall. Hamugaway silang miuliot padung sa ilang adtuan.

“Krista, pagpili lang sa gusto mong paliton,” matod sa Daddy ni Krista.

Human mabati ni Krista ang maong mga pulong dihay butang nga kalit nga misantop sa iyang hunahuna. Mao nga gidumdom niya ang nahimutangan sa mga duwaan ug taudtaod nga namili. Nadani ang iyang pagtagad sa usa ka monyeka. Nindot ang maong monyeka. Mopiyong kon pahigdaon. Molakaw kon tuslukon ang buton nga naa sa likod. Duha ka tiil ang gitas-on niini ug bayhon sa usa ka batang Amerkana. Buwagaw ang buhok; hilaw nga pagka asul ang mga mata; ug puti ang hamis niining pamanit. Angayan kaayo kining tan-awon nga gisul-oban og bistida nga lapaw sa tuhod ang sidsid.

Gidala ni Krista ang monyeka ngadto sa iyang Daddy ug Mommy aron mabayran.

Human sa makutas nga pag-shopping mipatighug ang tulo sa ‘snack bar’ nga diha ra usab sa Mall. Mikaon sila og ‘cake’ ug midimdim og mabugnaw nga ilimnon. Mirelaks sila sa makadiyot.

Naghingudto na ang adlaw dihang nagdagan na ang ilang sakyanan pauli. Ug sa pipila lang ka mga gutlo nahitangka na kini sa ganghaan sa kongkreto nga nagliyok sa harianon nilang pinuy-anan. Mibusina ang drayber aron mabuksan sa suluguon ang ganghaan. Kay nadugay ang pagbukas mikanaog na lang si Krista ug misutoy pagdagan nga nagsapnay sa pinalit niyang duwaan paingon sa kilid sa ilang koral diin didto nagsandig ang usa ka barungbarong.

Milili si Krista sa pultahan ug gisangpit si Ara nga iyang katalirungan.

“Uy, Krista, ikaw man god diay! Dali, sulod!” agda ni Ara.

“Hain diay imong Nanay, Ara?” ni Krista nga nagyaka sa sawog.

“Wa pa man mauli nga nanguykoy og basura.”

“Nia koy ihatag nimo. Pinaskuhan ko ni nimo,” ni Krista. “Ablihi!”

Di makatuo si Ara sa iyang nakita, “Imo ning ihatag nako?”

“O, uy! Luoy man ko nimo. Pinunitan lang sa basurahan imong mga duwaan!” ni Krista. Nakita niya nga dihay mga luha nga milugmaw sa mga mata ni Ara.

“Salamat kaayo, Krista!” ni Ara nga namahid sa iyang luha.

“Way sapayan, uy! Ingon si Daddy, ang pagbinatiay ug paghinatagay maoy mensahe ug diwa sa Pasko!” ni Krista nag nagpahiyom. (KATAPUSAN)

Newspapers in Tagalog

Newspapers from Philippines

© PressReader. All rights reserved.