MGA BAKWIT SA NAGA MAKAPAULI NA

Dul-an sa 1,000 ka mga pamilya nga mga bakwit sa dakbayan sa Naga nga nagpuyo sa mga dapit palibot sa ground zero sa Barangay Tina-an, mahimo nang makabalik sa ilang mga pinuyanan sugod kagahapon, Huwebes, Disyembre 13.

Kini human nadawat na sa Siyudad ang resulta sa re-assessment sa Mines and Geosciences Bureau (MGB) Central Office sa dapit, diin giila ang critical, danger ug regulated zones.

Ang critical zone nga mao ang ground zero, di na mahimong balikan. Apan ang danger ug regulated zones mao nay gi-clear alang sa pagpabalik sa mga residente.

Ang landslide sa Barangay Tinaan niadtong Septiyembre gihulagway nga maoy labing dako nga katalagman nga niigo sa Sugbo karong tuiga.

Gani moabot sa 78 ang mga nakalas sa trahedya, mas daghan kon itandi sa 25 ka mga fatality sa nagakdaiyang dapit sa amihanang Sugbo atol sa super typhoon Yolanda niadtong 2013.

Atol sa full council meeting sa Provincial Disaster Risk Reduction and Management Council (PDRRMC), lakip si Mayor Kristine Chiong sa gipahatag og report labot sa insidente ug dugang update human sa hitabo.

Gipahibalo sa mayor nga niadtong Martes, Disyembre 11, nadawat niya ang resulta sa re-assessment o harmonized assessment sa MGB Central Office labot sa landslide area, lakip na sa palibot niini.

Base sa delineated map nga gihatag sa ahensiya, gibahin og tulo ka sektor ang dapit.

Kini mao ang critical zone nga gi-koloran og maroon, danger zone nga gikoloran og red ug regulated zone nga gikoloran og green.