SHABU BAYAD SA PAGPATAY

'HITMAN' NAPUSILAN SA PULIS SA MABOLO

Giingong hitman sa usa ka drug personality sa Sugbo nga giingong mahimo lang baryran og shabu bugti sa pagpatay nadakpan human napusilan sa kapulisan.

Siya naigo sa sampot human nisuway pagpamusil ug nieskapo gikan sa mga sakop sa Mabolo police station atol sa buy bust operation sa Barangay Apas, Huwebes sa kaadlawon, Disyembre 13.

Ang nasamdan giila nga si Arwin Cabriana Tapales, hingkod, taga Sto. Niño, Baragay Inayagan, siyudad sa Naga.

Matod ni Chief Inspector Dindo Alaras, hepe sa Mabolo police station, nga sa dihang nagpaila na nga pulis ang nipalit og usa ka pakete sa gituohang shabu, si Tapales nibunot sa iyang dala nga armas.

Sa dihang wa kini mobuto, nikalit kinig sakay sa iyang motorsiklo ug nipadagan paingun sa JY sa Barangay Lahug.

Dinhi na siya gipusil sa usa ka pulis sa Mabolo nga miresulta sa pagkaigo sa iyang lubot.

Nakuha gikan kaniya ang siyam ka mga pakete sa gituohang shabu ug usa ka medium size nga mobalor ang tanan og P22,000 ug ang revolver.

BAYRAN OG SHABU

Gitug-an ni Alaras nga wa malakip sa target list sa Mabolo police station si Tapales, apan gitudlo kini nga hitman sa mga drug personalities nga di makabayad sa illegal nga drugas.

Ang bayad sa pagpatay sa usa ka tawo mao ra usab ang binulto sa illegal nga drugas nga mao usab ang iyang ibaligya sa iyang mga kustomer.

“Bisan kinsa ang iyang tirahon, labi nag makadispalkog kwarta. Unya modawat sad ni siyag bisan unsa, basta mobayad og sakto” dugang ni Alaras.

Pipila ka semana na ang nakalabay adunay impormasyon nga nadawat ang Mabolo police station labot sa illegal nga kalihukan ni Tapales nga maoy hinungdan nga gipasubay kini ni Alaras.

Gipasuwayan gyud kini niyag palit ug sa dihang nag positibo nagplano na dayon sila sa buy bust operation.

Samtang alas 11:30 sa Miyerkules sa gabii, Disyembre 12, nasikop usab sa Pardo police station ang usa ka 35 anyos nga lalake ug iyang kauban nga 68 anyos nga lola sa sitio Laray, Barangay Lorega.

Ang nasikop giila nga si Jorey Trangia Casera ug Lolita Goyo Pepito nga nagpuyo ra usab sa maong dapit.

Atol sa buy bust operation nakuha gikan kanila ang 23 ka pakete ug laing unom nga gituohang shabu nga motimbang og 79 gramos nga gibana-bana sa kapulisan nga mobalor tanan og P537,200. /

/ ARNI ACLAO ■GI-IMPOUND: Nagtipun-og pa ang mga motorsiklo sa impounding area sa Cebu City Transportation Office (CCPO) sa South Road Properties (SRP). Di na kini managhan human si Cebu City Mayor Tomas Osmeña mipahibawo nga mohatag siyag “amnesty” sa mga nakalapas sa counterflow sa unang higayon. Estorya sa pahina 3.