'Amnesty' sa mga first offender sa counterflow
Sayo ang gasa sa Pasko sa pipila ka mga motorista sa Siyudad sa Sugbo.
Isip temporaryong solusyon sa pag-ban sa mga habalhabal, mga motorsiklo nga gi-impound tungod sa counterflowing nga way pending nga kalapasan o multa, i-release sa City Transportation Office (CCTO).
Kini ang pahibawo ni Mayor Tomas Osmeña sa Huwebes, Disyembre 13, atol sa iyang pagpamulong atubangan sa mga barangay tanod sa social hall sa Cebu City hall.
“In the spirit of Christmas, I will grant spot amnesty. Ang mga tawo way motor kay na-impound. Mosakay na lang sila sa Angkas. Unya wala na may Angkas. All the impounded motorcycles now at the SRP (South Road Properties) will be released,” siya niingon.
Niadtong Miyerkules, Disyembre 12, ang Korte Suprema niisyu og temporary restraining order batok sa hukom sa usa ka korte sa Mandaluyong nga nagpugong sa mga awtoridad sa pagpanakop sa Angkas, nga nagpasabot nga mahimo na silang dakpon.
Matod sa Land Transportation Franchising and Regulatory Board nga ang tanang motorcycle drivers nga mamasahero, naa o wa may Angkas application, dakpon ug ang ilang motorsiklo i-impound.
Gitataw ni Osmeña nga ang anti counterflow magpadayon ug ang traffic enforcers pabiling manakop sa mga makalapas.
“Let’s be clear, we’ll continue the anti-counterflow (measure). This is just a spot amnesty, but we won’t stop arresting anyone. I hope they learned their lesson and they will follow the law,” siya nidugang.
Ang Executive Order (EO) 34 nagsilot sa mga motorista nga mo-counterflow o mo-drive sa sayop nga lane sugat sa traffic.
I-impound og 30 ka adlaw ang mga sakyanan sa mga drayber nga masakpan, samtang ang nakalapas na og kaduha, i-impound og 60 ka adlaw.
Sukad sa pagpatuman niadtong Pebrero, 6,000 na ka mga motorsiklo ang na-impound.
Sa interbyu, matod ni Ouano nga dunay 500 ka mga motorsiklo ang na-impound sa storage area sa SRP tungod sa counterflowing.
Giklaro ni Ouano nga ang motorsiklo sa mga second time offenders magpabilin kay way apil sa spot amnesty.
“Naghatag og directive si Mayor karon nga tanan nga mo counterflow nga motorsiklo iyang ipa release, pero sa second time nga mo counterflow sila makita na nato for example ang ilahang ngalan, ilahang plate number, naa na siya sa system, second time around makita na nato nga second offender sila which is ato na gyud e impound for 60 days plus 100 pesos per day,” pasabot ni Ouano sa Superbalita Cebu.
Matod ni Ouano nga di mominus 50 ka motorsiklo ang madakpan sa pag counterflow kagahapong adlawa, Disyembre 13.
Kadtong una pa lang nilang nadakpan i-release nila, apan kon kaduha na, ilang i-impound og 60 ka adlaw.