CCTO di gihapon modakop; taga Angkas naproblema kay wa nay kapanginabuhian
Mga Angkas driver sa Siyudad sa Sugbo di angay nga mabalaka kay di sila panakpon sa mga traffic enforcer sa Cebu City Transportatioon Office (CCTO).
Samtang pipila sa mga sakop sa Angkas nang-resign sa ilang regular nga mga trabaho aron mobalhin sa pagdrive og motorsiklo.
Ang hukom sa Korte Suprema dako kaayo nila nga problema.
Gibutyag sa operations chief sa CCTO, Francisco Ouano, nga di sila manakop og mga Angkas drivers kon wala silay makita nga kalapasan nga gibuhat.
“Kon makita nato pananglitan nga nagpabadlong sila nga walay helmet, walay lisensya, mao nay I-consider nga dakpon nato. Pero prior ana nga wala silay mga sala, no need man ta sa dakop ana kay wala man tay katungod nga mo dakop bahin ana nga wala silay franchise. Ang ato lang, legal lang sila tanan, naa sila’y helmet, naa sila’y rehistro kompleto sila, that’s it,” matod ni Ouano sa Superbalita Cebu.
NANG-RESIGN
Pipila sa Angkas drivers ang niangkon nga nadismaya sila sa desisyon sa Supreme Court nga ipahunong ang operasyon sa Angkas.
Ang Angkas driver nga si Leocar Cabonegro, 26, niingon nga grabe iyang nabati nga kaguol pagka dungog sa maong balita nga dakpon na ang Angkas.
“Pagkahibaw gyud nako nga pangdakpon na kuno, naguol gyud ko kay ang kaning Angkas mao ra gyud ang panginabuhi nako. Actually, niundang gyud ko pagka jeepney driver kay nakadesisyon ko nga mo apil sa angkas,” asoy ni Cabonegro.
Subay niya dako kaayo ni og epekto kaniya ug sa iyang mga kauban tungod kay kasagaran nila ang pagpamasahero ang nag-inusarang pangita nila para ma suportahan ilang pamilya.
“Dako kaayo ug epekto kung ilaha nang hunungon og dakpon kay mostly sa mga kauban nako mga regular gyud sila og trabaho sauna unya karun nangundang sila kay nag Angkas. Unya mao na lang ang gisaligan nga pangita para masustentohan among tagsa-tagsa ka pamilya,” dugang ni Cabonegro.
Matod niya nga nanginahanglan silag kwarta ning Pasko ug Bag-ong Tuig.
Kon di na mausab ang hukom sa kagamhanan, mobalik siya sa pagpamasahero og jeep.
Niadtong Miyerkules, Disyembre 12, niisyu og temporary restraining order ang Korte Suprema aron sa pagpahunong sa operasyon sa Angkas.
Si Joseph Damandaman,28, usa na katuig sa pagka Angkas driver naguol usab og maayo.
Niundang lang siya og trabaho aron mag-Angkas driver.
“Dako kaayo og epekto kon maaprobahan kay karon dugay-dugay na jud ko miundang og trabnaho isip usa ka janitor ug ang pagka Angkas driver nalang akong pangita. Ang Angkas man gud maayo og kita nga di jud nako makuha sa janitorial,” pasabot ni Damandaman.
Matod niya nga mawagtangan siya og pangita kon pahunongon ang operasyon sa Angkas ug dugay pa maimpas ang iyang motorsiklo. “Na-shock gyud ko nga dili ko katuo. Karon problema lage kaayo asa ko mangita og trabaho ani,”