STL ug ang masiao
Daghan kaayong mga tawo ang nadakpan niadtong miaging mga adlaw tungod sa iligal nga sugal kun illegal gambling. Apan ang nakapahibung kanako kay adunay daghang mga namaligya sa Small Town Lottery (STL) ticket nga naapil pagdakop sa “One time, Big time” operation sa kapulisan tungod sa illegal gambling. Ngano man? Legal man kaha kining STL?
Didto sa Luzon raba gigamit kining STL nga front kon pantalya sa iligal nga sugal nga masiao sa jueteng. Gani tungod kay nabani-ug na kaayo ang maong isyu gipa-imbestigar kini sa kongreso og nasayran nga adunay kamatuoran ang maong pasangil.
Samtang ang STL legal apan kon gigamit kini og pantalya sa masiao gamay kaayo ang halin sa STL samtang daku kaayo ang kita sa masiao nga dili i-remit ngadto sa Philippine Charity Sweepstakes Office (PCSO) nga maoy tag-iya kon franchisor sa STL. Sa laktud nga pagka-sulti gibulsa lang ang dakung halin ug wa usab magbayad og buhis ang nagfranchize niining STL samtang gamay kon mumho lang ang halin nga mapunta sa gobiyerno. Mao kini nakapaburot sa bulsa sa mga financier.
Wala hinuon ako masayud kon gigamit ba usab ang STL dinhi sa Sugbo isip pantalya sa masiao sa swertres? Apan bisan sa pangugat sa financier sa STL dinhi sa Sugbo nganong wa man motuo ang kapulisan kanila ug gidakop gayud ang ilang mga tawo? Gani gitanggong kining tanang dinakpan sa prisohan ug nabuhi-an lamang kay napiyansahan.
Karon gi-usab na sa STL ang ticket nga ilang gibaligya. Kaniadto isuwat man lang kini sa yellow nga papel nga blanko nga mura gyud og ticket sa masiao. Apan karon gisuwat na sa ticket ang tatak nga Phil. Charity Sweepstakes Office sa ibabaw nga bahin samtang gipatik usab ang Small Town Lottery sa kilid.
Ang presyo sa P10 sa local draw P450 samtang sa national draw P500 ang P10 nga ticket. Wa hinuon ako masayud kon mahimo ba sila nga mamaligya house-to-house sama sa masiao. Ambut og migamit ba usab sila sa mga ticket nga gi-isyu na karon sa STL branch office nga adunay tatak sa PCSO ug STL.
Atong bantayan og dili na ba dakpon sa mga tinugyanan sa balaud kining mga tawo nga mamaligya house-to-house niining ticket sa STL. Hinaut pang dili madala sa suborno ang atong kapulisan kay nakadungog raba ako niadtong mi-aging dakop nga estoryahan kuno nila ang dagkung opisyal sa PNP aron ma-areglo ang kaso.
Kanunay nga gidakop ang mga pobreng maghantak, magduwa og baraha sa daplin sa dan ug tigbakay unya ato lang pasagdan kining grabeng illegal gambling sama sa masiao? Akong awhagon ang tanan natong ka-igsuonan sa pag-report ngadto sa kapulisan kon duna kamoy masayran nga nagduwa og sugal nga iligal labi na ang masiao sa STL.