Paghimo mihinay, momahal

Gitug-an sa mamuhatay og pabuto sa Purok Rambo, Brgy. Babag dakbayan sa Lapu-Lapu nga nihinay ang ilang production sa mga pabuto karong tuiga.

Kini gumikan sa pagmahal usab sa presyo sa mga materyales sama sa papel, pulbora ug mga isagol nga mga chemical.

Gibutyag ni Floredo Baraquel ang presidente sa mga mamuhatay ug pabuto sa Purok Rambo Brgy Babag nga gumikan sa pagka ni-hit sa ilang mga materyales pagbuhat ug pabuto napugos gayud sila sa pagpamahal usab sa ilang baligya.

Kon sa miaging katuigan mahimo pa siyang makahatag og tag P1 matag buok sa pipila ka mga pabuto sama sa whistle

bomb, kwitis ug shotgun apan karon tag P2 na gayud ang iyang hatag niini sa iyang mga kustomer.

Gawas sa pagka ni-hit sa ilang production giangkon ni Baraquel nga niminos na usab ang ilang mga myembro nga mamuhatay ug pabuto sa Brgy Babag gumikan sa kamahal sa mga materyales.

Kon sauna moabot sa 48 ka mga miyembro ang naglangkob sa ilang grupo apan karon anaa na lang sa 40 ka mga miyembro ang nagpasakop kanila.

Minos usab ang order nga ilang nadawat gikan sa ubang dapit.

Si Baraquel usa na sa mamuhatay og pabuto sa Brgy Babag sukad pa niadtong 1986.

“Hinay man amo trabaho ron kay nangita naman mi og dakong capital gyud kay mahal naman ang chemicals, permit pa jud”.

“Ang sa ako makahatag pa ko sa mga karaang suki ug P1.50 sa whistle, kwitis pero sa uban nga kuan ron P2 na gyud,” pagbutyag ni Baraquel ning mantalaan.

Karong Disyembre 16, Dominggo, maoy unang adlaw nga mahimong maka display sa ilang tindang pabuto ang mga manindahay sa Brgy Babag.

Gikatakdang motapos kini sa Enero 1 sa Bag-ong Tuig.

Apan pipila sa mga manindahay ang nipasidaan na daan nga posibleng momahal gayud ang ila usab nga mga tinda.

Gibutyag ni Crosino “Boboy” Ochea, kinsa naninda na og pabuto sukad niadtong 2003, nga 70 ngadto 100 porsiyento ang posibleng isaka sa ilang mga presyo sa pabuto karong tuiga sanglit mahal ang ilang kompra sa ilang baligyang mga pabuto sa mga mamuhatay.

Gitug-an ni Ochea nga pulos lokal lang ang iyang mga baligya gumikan kay way niabot nga mga pabuto nga ginama gikan sa China tungod usab sa posibleng paghugot sa mga otoridad batok sa mga smuggle nga mga pabuto.

“Wa may mga stock ang mga bodega, katong nga dagkong negosyante nga nagpundo jud, tiwasan pa atong unang tuig nga hurot-hurot jud so karong bag-o wa pajud kaayo nakabuhat tungod sa giingon nako nga way supply,” tubag ni Ochea sa pangutana kon nganong napugos siya pagpamahal sa iyang tindang pabuto.