59 anyos nga runner adunay panghinaot

Nanghinaot ang beteranong runner nga si Abby Ponce nga suportahan sa komunidad ang Cebu Marathon sa pagpahigayon niini sa ilang ika-12 nga edisyon karong Enero 13 sa sunod tuig sa Cebu Business Park.

Si Ponce, 50, mihangop na ning maong lumba gikan sa pagsugod niini niadtong 2008.

Wala masipyat si Ponce sa pagsalmot sa lumba sa tanang edisyon niini isip iyang pahinungod sa balaang bata nga si Sto. Niño. Ang lumba usa sa mga kalihukan sa Sinulog Festival.

“It’s my way of honoring Sto.Niño and starting the year right. Running is really for every one; you run regardless of the distance or your age,” matod ni Ponce.

Ang lumad nga taga Talamban, Cebu City nakasamot na sab og marathons sa Australia, Japan, Kuala Lumpur ug Singapore diin suportado sa katawhan ang kalihukan.

“I wish there will be more support just like the races in abroad. In races here you can hear complaints from the commuters, I hope it lessens since this is only done once a year,” pasabot ni Ponce.

Nagkanayon si Ponce nga ang labing unang edisyon sa Cebu Marathon mao ang labing halandumon alang kaniya.

“It was bongga jud kaayo and very festive and different,” pasabot ni Ponce.

Ang nag-organisar sa lumba nga mao ang Cebu Executive Runners Club (CERC) naglaum nga moabot ngadto sa 3,000 ka runners gikan sa 30 ka mga nasod ang mangapil sa ika-12 nga edisyon.

Ang mga kategoriya sa lumba mao ang 42-kilometer, 21K and 5K. Ang tanan adunay men’s ug women’s divisions.

Hangtod na lang karong Disyembre 16 ang rehistrasyon nga nagbalor og P2,100 sa 42K, P1,800 sa 21K ug P750 sa 5K.