BEEPS MOBIYAHE NA KARON

24 ORAS ANG ILANG OPERASYON; P8 MINIMUM NGA PLETE

■MOBIYAHE NA: Kon nag-agwanta ka sa mga PUJ nga daan, niay maayong kalamboan. Sugod karong adlawa, Biyernes, Disyembre 21, magsugod na pagpamasahero ang mga beep kun bus/jeep sa piniling mga rota sa Cebu City nga kabahin sa modernisasyon sa pampublikong transportasyon. Duha ka kolor sa beeps ang mamiyahe, puti ug blue nga nag-trial kagahapon sa hapon sa Huwebes, Disyembre 20.Estorya sa pahina 2.

Hamugaway, bugnaw, ug aduna’y wifi, ang pipila sa mapaabot sa publiko kon mosakay sila sa moderno nga jeep nga gitawag nga “Beep” nga hingpit nang modagan karong adlawa.

Sa minimum nga pletehan nga P8 alang sa unang lima ka kilometro ug P1.50 alang sa mosunod nga kilometro, mamahimo na nga makasakay ang bisan kinsa kon gikan sa Cebu City Hall o sa Paseo Arcenas, Banawa, dakbayan sa Sugbo.

Kagahapon, Huwebes, Disyembre 20, gisuwayan sa tigdumala sa maong modernong jeep nga Persano Corporation ang pagpadagan isip trial run kon asa kini mohunong ug asapwede nga makapasakay og pasahero.

Alang sa orihinal nga rota nga gikan sa Cebu City Hall, anaa kini’y 15 ka loading ug unloading area, samtang ang maggikan sa Paseo Arcenas, anaay 20 ka stops.

ASA PWEDE MOSAKAY

Matod sa Operations Manager sa Persano Corp., Warren Flores, nga strikto nga sa loading ug unloading area ra mamahimong monaog ug mosakay.

Alang sa biyahe nga magsugod sa City Hall paingon sa I.T. Park ug vice versa, aduna kini’y gilay-on nga 11.9 kilometros samtang ang gikan sa Paseo paingon sa Sykes (Panagdait) adunay gilay-on nga 14.7 kilometros.

Adunay 20 ka mga unit sa beeps ang mo byahe gikan sa Cebu City hall paingon sa IT park via Robinsons Galleria, Cebu Business Park ug vice versa.

Gigahin sab ang 20 ka mga unit sa beeps sa ruta gikan R.Duterte Street paingon sa Sykes via Happy Valley, Fuente Osmena, Ramos St., D.Jakosalem Street, Cebu Business Park ug vice versa.

Magsugod kini pagdagan karon adlawa, Disyembre 21 sa alas 9 sa buntag ug 24 oras ang operasyon niini.

Sa pagkakaron, cash una ang dawaton nila nga plete tungod kay gisugdan pa nila pagpamaligya ang beep cards apan activated na ang tap machine niini.

Duha ka klase ang beep jeepneys, ang blue ug ang white.

Ang blue, anaay 34 ang kapasidad lakip na ang driver ug standing niini, 26 niini ang naglingkod.

Samtang ang white, anaay 32 nga kapasidad, 23 ang seating lakip ang driver.

Lakip sa nisakay sa trial run kagahapon si Cebu City Councilor Jun Gabuya aron mosuta sa mga stops niini. Namatikdan nga di tanan

stops niini aduna’y waiting shed. Matod ni Gabuya nga tun-an niya kini ug sa umaabot posible nga matabangan sa Cebu City Government nga mabutangan og waiting shed aron aduna’y kapasilungan ang mga pasahero.

Alang sa mga beep cards, mamahimo kining mapalit sa designated outlets, malls nga i-anunsiyo sa Persano Corp.

Apan matod ni Flores nga pwede usab kini mapalit sa Passenger Assistance Officer (PAO) diin mao usab kini ang mangolekta sa plete.