GABUYA BUOTAN: KAUBAN, MGA HIGALA

Kamatayon ni Sr. Inpector Porferio Gabuya Jr. gikasubo sa iyang kaubanan ug kahigalaan.

Ang kanhi hepe sa duha ka mga police station sa dakbayan sa Sugbo una pa gidestino sa Guihulngan City, Negros Oriental isip deputy chief, gihulagway nga buotan ug maayong tawo.

Si Gabuya gipusil patay sa duha ka armadong mga lalake nga nagmotorsiklo samtang siya nagkape atbang sa police station sa Barangay Poblacion.

Matod ni Sr. Insp. Dexter Basirgo, hepe sa Guadalupe police station nga dakong kawad-on sa PNP organization ang nahitabo kang Gabuya sanglit usa kini ka maayong klase sa pagka pulis.

Way ikasaway si Basirgo kang Gabuya sa dihang nagkauban sila isip mga operatiba sa Cebu City Police Office.

GIDAYEG

“Buotan ug matinabangon nga tawo.” Mao ni ang sulti sa mga suod nga higala ug silingan sa una ni Gabuya sa Barangay Tejero, Dakbayan sa Sugbo.

Nahimong hepe sa Talamban ug Parian police station si Gabuya sa wa pa siya gibalhin sa Guihulngan City, Negros Oriental kay nagkuwang og mga opisyal.

Si Gabuya usa ka residente sa una sa Barangay Villagonzalo II, Tejero siyudad sa Sugbo tungod kay siya naminyo apan mibalhin kini ug ang pamilya human nakapalit og balay sa Talisay.

Bisan pa og wala na nagpuyo si Gabuya sa Barangay Tejero, ang iyang mga suod nga higala ug silingan wala gihapon nalimot sa iyang ka maayo ug kamatinabangon.