Ewas panagana ra: Obon
Gipasabot ni Lapu-Lapu City police director Sr. Superintendent Limuel Obon nga precautionary measure lang o pagpanagana sa posibleng mahitabo ang pagkalakip sa Election Watchlist Areas (EWAs) sa dakbayan kauban sa mga dakbayan sa Mandaue ug Sugbo. Matod ni Obon nga isip highly urbanized city, ang dakbayan sa Lapu-Lapu adunay baga nga populasyon hinungdan nga nanagana sila nga matutokan kini sa kapulisan.
Hilabi na nga sa higayon nga mahuman na ang pagsaulog sa Pasko ug Bag-ong Tuig, mao na usab unya kini ang pagsugod sa kisaw sa pulitika sa dakbayan.
Giklaro ni Obon nga wa pa siyay nahibaw-ang kandidato sa umaabot piniliay nga posibeng momugna og kagubot sanglit maayo ang relasyon sa matag kandidato.
Gani wa siyay nadunggan nga adunay mga kandidato nga nalambigit sa ilegal nga kalihukan o nagtinir ug armadong grupo.
“Kuan lang na ang definition namo diri sa kuan, labi na sa kapulisan, ano kung naa mi gi-foresee ano, ina-anticipate na nato kay usually man gud.. the police, we prepare for security for something nga activity. We always expect for the worse,” pagpasabot ni Obon. Gihangop usab sa director nga adunay kampo sa dakbayan nga planong mopahigayon og peace covenant sunod tuig.
Alang kaniya makaayo ang ingon ini nga mga kalihukan aron makuha ang commitment sa matag kandidato alang sa hapsay ug malinawon nga piniliay.
“Para makasiguro ta nga basin pa, sa ilang mga kasingkasing sa atong mga magpatudlo, part sa pagiging responsibility as a public servant is iwas jud ta sa mga samok nga panghitabo,” dugang pa niya.
Ang maong pamahayag gihangop usab ni Lapu-Lapu City Mayor Paz Radaza kinsa una nang nahibulong sa pagkalakip sa dakbayan sa Ewas.
Matod sa mayor ang kapulisan maoy mas nasayod sa ilang ipatumang security plan sa dakbayan sa umaabot piniliay.
Dugang sa mayor gitagaan sa dakbayan ang kapulisan ug mga sakop sa City of Lapu-Lapu Allied Force (CLAF) matag Police Station aron masigurong dunay kaabag ang kapulisan sa pag monitor sa kahapsay ug kalinaw sa dakbayan. “On the other side of it hinuon, kon ingon ana diay for the safety sa mga mamotaray, sa katawhan, I think okay ra”, dugang sa mayor. /