Mga pasahero gipaabot nga modagsa sa CSBT

Karong adlawa gipaabot nga magsugod na sa pagdagsang ang mga pasahero sa Cebu South Bus Terminal.

Gilantawan pa nga mas modaghan ang mga pasahero atol sa weekend hangtud na sa Lunes, Disyembre 24, nga bisperas usab sa Pasko.

Gipaabot ni CSBT Operations Manager Joy Tumulak nga magsugwak na ang mga pasahero sa terminal sugod ugma. Tungod kay mo-agi og weekend, gitumbok niya nga mas daghan unya ang mobiyahe paingon sa kalungsuran alang sa Christmas holidays sunod semana.

Subay niini, giawhag niya ang mga pasahero pagplano daan sa ilang biyahe ug mosayo aron makalikay sa holiday rush.

Sa laing bahin, si Gloria Lapinid wa na makapaabot karon o sa weekend aron mouli sa lungsod sa Pinamungajan.

Matod niya, kinahanglang mosayo sa pagbiyahe aron kalikayan ang pagdasok sa mga pasahero ug ilabi na ang grabeng traffic sa kadalanan.

Dugang niya, mas nindot usab mobiyahe nga way init kay mao kini makapaluya.

Sugod usab karon, i-deploy na sa terminal ang dugang police ug security personnel nga moatiman sa seguridad sulod ug gawas sa pasilidad.

Gipaabot nga mohimo usab og inspeksiyon sa road worthiness sa mga public utility vehicles ang mga tinugyanan sa Land Transportation Office (LTO) ug Land Transportation Franchising and Regulatory Board (LTFRB).

Matod ni Tumulak, sila nga mga kawani sa CSBT naka-full alert ug di mahimong magleave o mo-absent.

May ipadala sab nga dugang

personnel gikan sa Kapitolyo aron makatabang kanila pagpatunhay sa kahapsay sa terminal.

Sa laing bahin, kompiyansa si Gobernador Hilario Davide III nga ma-manage ra sa mga tinugyanan sa CSBT ang bulog sa mga pasahero nga manguli sa kalungsuran alang sa Christmas break.

Kini tungod usab sa taas nga

stretch sa mga adlaw sa di pa ang Pasko.

Buot pasabot ni Davide, mabahin-bahin ang mga tawo sa pag-adto sa terminal sugod karon, sa Sabado ug Domingo hangtud na sa Lunes.

Matod niya, dili sama sa nilabay nga Kalag-Kalag ug Holy Week, diin usa o duha lang ka adlaw ang magamit sa mga tawo pagbiyahe paingon sa ilang mga destinasyon.

/ TAMPO NI JOY F. TUMULAK ■ SEGURIDAD: Sayo pa lang gani, gipahugtan na sa Cebu South Bus Terminal (CSBT), ubos sa pagpangulo ni terminal manager Jonathan Tumulak.