Dad-a sa Kongreso
Naninguha karon si Mayor Tomas Osmeña sa pagtabang sa Angkas ug mga habalhabal driver. Una niyang lakang mao ang paghatag kanila og tag usa ka sakong bugas humay. Ikaduha, nangayo siyag pagtugot sa Konseho nga makarepresentar sa Angkas alang sa legal nga lakang ngadto sa Korte Suprema.
Di pa tingali makalimot ang mga habalhabal driver, labina kadtong mga taga Lahug ug Apas, sa iyang saad nga magtukod og terminal alang kanila. Apan matapos na ang iyang termino sa sunod tuig, wa pay bisan usa na lang ka kabilya ang nibarog.
Maglisod tingali siya sa pagtuman sa iyang saad tungod kay di legal ang mga habalhabal. Basin makwestyon siya kon iyang buhaton. Maayo ra sab nga wa matuman tungod kay kasayon rang pangitaon sa mga habalhabal drayber, adtuon ra sila sa terminal kon dakpon. Sa pagkakaron, pina ninja ang ilang operasyon. Kanang tago-tago ba.
Ang gibuhat unta ni Osmeña mao ang pagsige og awhag sa iyang duha ka kaalyadong mga kongresista, Rep. Raul del Mar sa norte ug Rep. Rodrigo Abellanosa sa south sa pagpalabang sa balaudnon alang sa paghimong legal sa operasyon sa habalhabal.
Mas maayo pa ni nga lakang kay malungtaron ang epekto. Kon iya pa ning gilihok human maduso ni Del Mar ang iyang balaudnon sa Ubos Balay Balauranan, hayan duna nay kahigayunan nga ma-legal ang ilang pagpamasahero.
Ang balaudnon ni Del Mar mag-amendar sa usa ka probisyon sa balaud sa transportasyon ug Local Government Code aron ang local government units (LGU) mahatagan og gahom nga modumala ug mag-regulate sa habalhabal operation.
Mas nindot pa unta kini nga lakang kay sa karon nga iyang pagahimuon. Kadudahan pa siya nga nagpahumot alang sa 2019 elections.
Di pa man tingali uwahi kon ang iyang lakang magpunting sa hawanan sa Kongreso.