I-legalized na lang ang habal-habal

Ang City Hall pinaagi sa Konseho migahin og P15 million aron ipalit og bugas aron ihatag ngadto sa mga miyembro sa Angkas ug habal-habal drivers nga posibling mawad-an og panginabuhian gumikan niining sub-sub nga pagpanakop sa Land Transportation Office (LTO 7) ug Land Transportation Franchising and Regulatory Board (LTFRB). Kini human mipagawas og desisyon ang Korte Suprema og Temporary Restraining Order nga nagsuporta sa baruganan sa Department of Transportation (DOTr) nga illegal ang mga motorcycle for hire.

Bisan ang Angkas ra ang giTRO sa Supreme Court, napagan ang mga habal-habal kay illegal gihapon. Gumikan niini, ang mayor mi-awhag sa Konsiho sa paggahin sa maong kantidad aron ipalit og bugas ug ihatag sa mga sakop sa Angkas ug habal-habal drivers.

Pamulitika o tinud-anay gyud nga hinabang? Sama sa iyang paghatag og ‘amnesty’ o pasaylo niadtong mga nadakpan sa counterflowing, kining maong lakang sa mayor klaro ug tataw nga pamulitika. Aw, nagsingabot na god ang eleksiyon. Pa-pogi points ba. Ang mga rehistradong botante sa dakbayan sa Sugbo nga Angkas ug habal-habal drivers maoy mahatagan. Sama sa mga senior citizens, persons with disability ug kapulisan nga ang registered voters ug mga residente sa siyudad ang hatagan.

Unya pila ra man pod nang usa ka sakong bugas? One shot deal ra na. Kon daghan ang mga sakop sa pamilya sa usa ka habal-habal driver mahurot ra dayon na way usa ka buwan. Asa man mangita ang amahan nga driver para pangsud-an ug ubang galastuhon sa pamilya? Ayaw kog ingna nga kanunay mosuporta ang City Government. Gibana-banang adunay 6 mil ka mga habal-habal drivers nga nag-operate dinhi sa siyudad. Madala nimo nag tabang kada buwan?

Kay long term ni nga panginabuhi, angay mohimo og lakang ang local officials kay tibuok nasud ning problemaha. Awhagon ang nasudnong mga magbabalaod nga i-amendar kanang balaod sa transportation law (Republic Act 4136) nga magtugot na unya sa motorcycle nga pasaheroan. Pero i-regulate lang. Unsa man goy sakyan sa mga tawo sa kabukiran habal-habal ra man.