Suporta sa habal-habal
Daghan ang buot nga ipadayon ang pagpamasahero sa mga habal-habal apil na ang sa grupong Angkas. Si Arsobispo Jose Palma uyon nga ipadayon ang operasyon sa habal-habal. Gani, sumala sa arsobispo, ang iyang inahan ug siya mismo kanunay mosakay og habal-habal sa didto pa siya sa Iloilo.
Sa iyang bahin, si Cebu City Mayor Tomas Osmeña nangayo og authority sa Cebu City Council aron siya mo-apilar sa desisyon sa Korte Suprema nga nagdili sa pagpamasahero sa mga motor. Popular kining hangyo sa mayor tungod kay suportado kini sa daghang mga pasahero nga nagpuyo sa hilit nga mga dapit, labi na sa kabukiran, tungod kay way PUJ ug ubang klase sa public transport ang mobiyahe sa maong mga dapit. Hinuon, anaay mga tagiyag sakyanan nga supak sa operasyon sa habal-habal kay, sumala pa nila, naghatag kinig dugang kasamok ug trapik sa kadalanan.
Suma sa mga oposisyon nga kining hangyo ni Mayor Osmeña pamolitika. Dili gayud kalikayan kining maong pasangil tungod kay hapit na ang midterm election nga himuon karong Mayo 13, sunod tuig.
Gituhoan hinuon nga mapugos ang oposisyon sa Konseho sa paghatag sa mayor sa gipangayong authority kay mabati ang ilang record sa daghang mga botante kon dili sila mohatag sa maong gipangayo ni Osmeña. Mao ni giingon nga sa pulitika isig palusot lang.
Nalangay ang mga sakop sa Cebu Provincial Board (PB) sa paghukom kon hatagan ba nila og authority si Gobernador Hilario Davide III sa pagpirma sa kontrata tali sa Cebu province ug sa winning bidder sa tukoron nga building sud sa Capitol compound. Nasayran nato nga nagtabla ang botos sa deferment kun paglangay sa pagpirma sa maong kontrata sa sesyon sa PB niadtong Disyembre 17. Gipaabot pa nila kon unsa ang opinion sa Department of Interior and Local Government (DILG) kon gikinahanglan ba ang simple majority o qualified majority sa botasyon.
Ako nagtuo nga aduna nay mga bokal nga nabalaka tungod sa hulga ni Kongresista Gwen Garcia, kandidato sa pagka-gobernador sa Sugbo, nga iyang ikiha ang tanang mopaluyo sa pagtukod niining building sa provincial resource center. Natay-ug usab ang maong proyekto sa isyu sa subornuhay diin minilyon kuno ang nadawat sa mga balhibuon og kamut nga taga-Kapitolyo.
Karon, miingon na usab si Gobernador Hilario Davide III nga dili siya maguol kon dili siya hatagan og authority kay naa na man kunoy na-aprobahan nga supplemental budget alang nga ibayad sa loan nga maoy igasto sa pagtukod sa maong edepisyo. Wa na diay kuno siya magkinahanglan sa maong PB authority. Sa ato pa ihinayon gayud ang pagtukod niining kontribersiyal nga building bisan kon dili motugot ang mayoriya sa PB? Nganong dalion man gayud kining maong proyekto og di nalang huwaton human ang eleksiyon? Tungod ba sa lingin ng katarungan?