Pasko na! MMFF na! Gugma beh... aw!

Husto man gud na! Panahon sa gugma man kaha ang Pasko? Mao na nga kon motimbaya ta og ‘Malipayong Pasko,’ sumpayi sab dayon og ‘gugma be.’ Anà! Simpol!

Sa adlaw sa Pasko mismo, moabli ang Metro Manila Film Festival (MMFF) usa sa mga kusog nga entrante mao ang Fantastica ni Vice Ganda, Dingdong Dantes, Richard Gutierrez ug uban pa.

Nangunay gyud pag-promote si Vice, Dingdong ug Eloisa Andalio adtong Dominggo didto sa SM Seaside City Cebu diin nagkaguliyang ang duot sa mga tawo uy paggawas sa mga artista.

Sa interbyu namo ni Vice, iya kunong gidasig ang usa sa mga bosing sa Star Cinema nga si Olive Lamasan nga kaatrason tungod sa dagkong talent fee ni Dingdong ug Richard.

Iya kunong giingnan nga mabawi ra ang gasto kay mokita man sab og P1 bilyon ang pelikula. Basin mokapin pa gani tingali. Paburger ug pa-kape unya, Vice ha?

Gipanghimakak usab ni Vice nga may kompetisyon ang iyang mga leading men. Gani sige ra kunog tsika ug komedyahay ang duha. Maayo kon mao!

Niangkon si Dingdong nga dakog gikatabang si Vice sa iyang pag-apil ning pelikulaha kay kini pa ang una niyang pelikula nga komedya gikan pagsugod hangtud paghuman.

Usa diay ka prinsesa si Eloisa nga taga Fantastica uban nila ni Maymay Entrata ug Kisses Delavin. Motan-aw ko ani aron makakatawa. Pasko god!

Abat-abat sab ning pelikula ni Anne Curtis nga Aurora nga apil sab sa MMFF. Ang Aurora usa diay ka barko nga nalunod duol sa isla nga gipuy-an ni Anne isip Leana ug sa iyang manghod nga si Rita.

Tuod man, gihamok sila si Anne sa mga kalag sa mga tawo nga naapil pagkalunod sa Aurora.

Hinimo ang Aurora sa Viva Films ug Aluid Entertainment. Ganahan kog hadlokhadlok mao nga seguradong molinya ko aron motan-aw ani.

Sa Facebook, ni-post ko nga di makapangangkon ang millenials nga solo nila ang mga kanta sa Spongecola, Phylum ug Missing Filemon tungod kay may mga seniors sab nga nalingaw didto.

Natingala lang ang akong higala ug klasmeyt sa high school nga si Vicente Miñao nga suheto man kaayo ang mga batan-on sa mga kanta sa tulo ka banda nga nitokar sa pista sa Oslob adtong Disyembre 9.

Syempre, kon kahibalo ang mga seniors, labaw na ang millenials. Ila god nang panahon! Anà!

Nahisgutan man gyud nato ang Missing Filemon, akong pahalipayan ang bokalista niini nga kauban sab nako sa Sun.Star (kanhi?) nga si Lorenzo ‘Insoy’ Niñal nga bag-o lang nipagawas sa iyang libro nga Ang Batang Scorpion nga compilation sa iyang mga sinulat sa mantalaan.

Maghimo sab kaha kog akong libro no? Di lang uy! Abi na lang ni Insoy wa koy originality. Hehe!