Maestra nakonsumisyon

Dear Papa Joe,

Ako si Helen, usa ka maestra. Nag handle kog elementary grader ug mao pa ni ang first time nakong tudlo. Wala gyud ko magdahom nga pwerti man diay kaayo ka stressful ang teacher.

Inig ka buntag sa dili pa ko mosud sa classroom, mag-ampo gyud ko daan nga tagaan kog igong pasensya nga dili ko makabuto sa akong kasuko. Daghan kaayong badlungon nga mga bata unya dili raba nimo makasab-an kay mosumbong dayon sa ilang mga parents unya ako dayon ang awayon, sulngon sa eskwelahan kay matod pa nila wala sila nibayad og monthly sa school para ako lang kasab-an ilang anak. Pero sa tinuod nag disiplina ra man ko kay mga tabian kaayo ug magsige og balhinbalhin og lingkoranan. Unya dili raba gyud makamao sa klase. Naa hinuoy bright nga mga bata, behave man ug mopatuo.

Pressure na kaayo ko ug wala na gani panahon sa akong lovelife. Kada hapon inig human sa klase, haggard na kaayo akong panagway ug nagsinaw-sinaw ang nawng sa kunsomisyon. I know daghang maka-relate ani nga maestra. Paminaw nimo, Papa Joe, unsa may imong ikatambag namong teachers? Tagai mig tip nga ma-control namo ang batang badlungon.

HELEN

Dear Helen,

Makasabot gyud ko sa gibati ninyong mga teachers kay ako gani og naay usa ka tawo magpatambag nako nga dili makasabot sa akong tambag, mohangak man gani ko, unsa na kaha ang mga maestra nga tag 20 – 30 ka buok bata ang gitudluan? Dili lalim ang inyong trabaho, maong sa gikaingon na ‘education starts at home’.

Pwede man siguro nimo estoryahon og tarong ang ginikanan sa bata nga sila ang mohinay-hinay og ingon sa ilang anak nga dili magkiat sa classroom. Dunay bata nga dili mopatuo og teacher pero mopatuo sa ginikanan. Try pod og reverse psychology kay naay bata nga mas mopatuo kon imong ulog-ulogan, pero mogara na sila og kasab-an.

PAPA JOE