DI MOTAHOD SA PEDESTRIAN DAKPON
TUMULAK MIMANDO SA CCTO PAGPATUMAN INI
Di ka mohunong o motahod og pedestrian lane, labina kon dunay mga tawo nga manabok?
Karon pagbantay, kay segurado kang dakpon kay estriktong ipatuman ang traffic rules taliwa sa grabeng trapiko ning Pasko.
Si Cebu City Councilor Dave Tumulak, chairman sa committee on public order and safety sa Konseho, niingon nga ang Siyudad higpit nga mopatuman sa balaud sa trapiko.
Si Tumulak niingon nga gusto siya nga ang Cebu City Transportation Office (CCTO) estriktong modakop sa mga mobabag sa intersections ug pedestrian lanes.
“We need to strictly implement the no obstruction on intersection, no obstruction on pedestrian crossing. We noticed that motorists usually block the intersections because they want to be ahead of the others,” siya niingon.
Si Tumulak mao ang ni-sponsor sa amendment ordinance nga nagpaumento sa penalty sa makalapas sa policy sa no obstruction sa intersection ug pedestrian crossing.
Matod ni Tumulak nga dunay grabeng pagpanglapas sa duha ka simple nga balaud sa trapiko.
“There are drivers that even if they saw that pedestrians are crossing on pedestrians lanes, they tend to speed up and that shows no respect to the law and to the pedestrians that is why they should be apprehended,” siya niingon.
Aron makiangayon usab sa drivers, si Tumulak niawhag sa mga pedestrian sa paggamit sa lane nga alang kanila.
Ang CCTO nisaad nga bisan Pasko, higpit nilang ipatuman ang balaud sa trapiko.
Dul-an sa 400 ka traffic enforcers ang gipakatap sa nagkadaiyang mga dalan sa siyudad aron pagdumala sa trapiko.
Bisan Pasko, matod ni CCTO operations head Francisco Ouano nga ang ilang enforcers wa tuguti nga mopahuway o mag vacation leave.
Magpadayon ang polisiya hangtod mahuman ang Sinulog 2019 sunod buwan.
NIARANG-ARANG
Kagahapon, naobserbahan na sa CCTO nga arang-arang na ang kahimtang sa trapiko kagahapon, Sabado, Disyembre 22.
Ang volume sa mga sakyanan niminos ngadto sa 15,000 itandi sa 40,000 sa nakalabay nga mga adlaw.
Nagtuo si Ouano nga tungod kini sa taas nga weekend.
“Nag-anticipate pud siguro ang mga tawo na mo-traffic na gyud og magkaduol sa Pasko maong nanguli na sila ug namalit pag-Biyernes. Nakasinati gihapon ta og traffic sa Sabado, pero dili na ingon ana ka grabi sa miaging adlaw,” siya ningon.
Naobserbahan ang paghuot hinuon sa trapiko sa downtown area tungod sa last minute nga pagpamalit alang sa Pasko.
BEEP HAPSAY
Samtang ang trial run sa modernong public bus-jeep (beep) padayong hapsay samang nagbiyahe sa kadalanan sa Dakbayan sa Sugbo.
Siya niingon nga ang mga driver sa mga beep nagsunod sa balaud sa trapiko. / RVC & RTF sa Sunstar Cebu